26. ‘Ua fesili atu Tavita i tagata na tutū fa‘atasi ma ia, ‘ua fa‘apea, “Se a se mea e avatu ma le tagata na te fasia lenei Filisitia, e galo ifo ai le fāifai ‘iā Isaraelu? auā po o ai lenei Filisitia lē peritomeina na te fāifai ai i ‘au a le Atua soifua?”
27. ‘Ona tali mai lea o le nu‘u ‘iā te ia e tusa ma ia ‘upu na muamua, ‘ua fa‘apea, “E fa‘apea ‘ona faia i le tagata na te fasi ‘iā te ia.”
28. ‘Ua fa‘alogo Eliapo lona uso e matuā i lana fesili i tagata, ‘ona tupu ai lea o le ita o Eliapo ‘iā Tavita, ‘ua fai mai fo‘i, “Se a le mea ‘ua e sau ai? ‘Ua e tu‘uina atu fo‘i ‘iā te ai nā mamoe itiiti i le vao? ‘ua ‘ou iloa lava lou fa‘amaualuga ma le leaga o lou loto, auā o le fia matamata i le tau‘a ‘ua e sau ai.”
29. ‘Ona fai atu lea o Tavita, “O le a ‘ea le mea ‘ua ‘ou faia nei? ‘Ua fai fua ‘ea la‘u mea.?”
30. ‘Ua liliu ‘ese o ia ‘iā te ia, ‘ua fa‘asaga atu i le tasi, ‘ua fai atu fo‘i pei o na ‘upu; ‘ona tali mai lea o le nu‘u pei o le lua‘i ‘upu.
31. ‘Ua latou fa‘alogologo i ‘upu na fai mai ai Tavita, ‘ona latou ta‘uina atu ai lea ‘iā Saulo. ‘Ona ‘a‘ami ai lea o ia ‘iā te ia.
32. ‘Ua fai mai Tavita ‘iā Saulo, “‘Aua ne‘i vaivai le loto o se tasi tagata ‘ona o ia; e alu lava lau ‘au‘auna e tau ma lenā Filisitia.”
33. ‘Ona fai mai lea o Saulo ‘iā Tavita, “‘E te lē lavā ‘ona ‘oulua tau ma lenā Filisitia, auā o oe o le tamaitiiti, a o ia o le toa talu ‘ona tamaitiiti.”
34. ‘Ona tali atu lea o Tavita ‘iā Saulo, “Sa leoleo lau ‘au‘auna i mamoe a lona tamā; ‘ona alu atu lea o le leona ma le urosa, ‘ua ‘ave le tama‘i mamoe nai le lafu;
35. ‘ona ‘ou tuliloa lea ‘iā te ia, ma ‘ou fasi ‘iā te ia, ma segi mai le mea nai lona gutu; na tu mai o ia ‘iā te a‘u, ‘ona ‘ou tago ai lea i lana ‘ava, ma fasi ‘iā te ia, ‘ua mate ai.
36. Na fasia e lau ‘au‘auna le leona ‘atoa ma le urosa; e fa‘apea fo‘i o lenā Filisitia lē peritomeina, e pei o so lā‘ua, ‘ina ‘ua ia fāifai i le itūtau‘a a le Atua soifua.”
37. ‘Ua fai atu fo‘i Tavita, “O le ALI‘I na ia lavea‘i ‘iā te a‘u nai le lima o le leona ma le lima o le urosa, o ia lava na te lavea‘i ‘iā te a‘u a‘i le lima o lenā Filisitia.”‘Ona fai mai lea o Saulo ‘iā Tavita, “Alu ia oe, ‘ia ‘iā te oe fo‘i le ALI‘I.”
38. ‘Ona fa‘a‘ofu lea e Saulo ‘iā Tavita i ona ‘ofu, ‘ua fa‘apulouina lona ulu i le pulou ‘apamemea, ‘ua fa‘a‘ofu fo‘i ‘iā te ia i le ufifatafata u‘amea.
39. ‘Ua fusi e Tavita lana pelu i luga o ona ‘ofu; ‘ona fa‘ata‘ita‘i lea o ia ‘ona alu, auā na ia le masani ai. ‘Ona fai mai lea o Tavita ‘iā Saulo, “‘Ou te lē mafai ‘ona alu ma nei mea, auā ‘ou te le‘i masani ai.” ‘Ona tu‘u ‘ese ai lea e Tavita o mea nai ‘iā te ia.
40. ‘Ua ia ‘ave lona to‘oto‘o i lona lima ma ‘ua filifili i ma‘a lamolemole e lima mai le alia, ‘ua fafao ai i le ‘ato o le leoleo mamoe sa ‘iā te ia, (o le taga fo‘i lea,) ma le ma‘atā i lona lima; ‘ona fa‘alatalata atu lea o ia i le Filisitia.