1. ‘Ua fa‘apotopoto mai Isaraelu uma ‘iā Tavita i Heperona, ‘ua fa‘apea mai, “Fa‘auta, o i matou nei o ou ivi ma ou ‘a‘ano.
2. O anamua fo‘i, ‘ina o fai Saulo ma tupu, o oe lava na e feta‘ita‘iina‘i ‘iā Isaraelu. Na fetalai mai fo‘i le ALI‘I lou Atua ‘iā te oe, O oe ‘e te leoleo i lo‘u nu‘u o Isaraelu, e fai fo‘i oe ma ta‘ita‘i i lo‘u nu‘u o Isaraelu.”
3. ‘Ona ō mai lea o toeaina uma o Isaraelu i le tupu i Heperona, ‘ia latou osia le feagaiga ma Tavita i luma o le ALI‘I i Heperona; ‘ua latou fa‘au‘uina fo‘i Tavita e fai ma tupu ‘iā Isaraelu, e tusa ma le afioga a le ALI‘I ‘iā Samuelu.
4. ‘Ona ō atu lea o Tavita ma Isaraelu uma i Ierusalema, o Iepuse lea; sa i ai sa Iepusē o ē o mau i le nu‘u.
5. ‘Ua fai mai ē na mau i Iepuse ‘iā Tavita, “‘E te lē sao mai ‘i‘inei.” A ‘ua ā‘ea e Tavita le ‘olo o Siona, o le ‘a‘ai fo‘i lea a Tavita.
6. ‘Ona fa‘apea atu ai lea o Tavita, “O sē na te mua‘i fasia sa Iepusē, e fai o ia ma ali‘i sili ma ta‘ita‘i.” Na muamua ‘ona alu a‘e o Ioapo le tama a Seruia, ‘ona fai lea o ia ma ali‘i sili.
7. ‘Ua mau Tavita i le ‘olo; o le mea lea na fa‘aigoaina ai e i latou, o le ‘a‘ai o Tavita.
8. ‘Ua ati e ia le ‘a‘ai e fa‘ata‘ali‘oli‘o, e amata mai i Milo e so‘o ai. ‘Ua fa‘aolaina e Ioapo o ē na totoe i le ‘a‘ai.
9. ‘Ua tupu pea lava le mamalu o Tavita; sa ‘iā te ia fo‘i le ALI‘I o ‘au.