40. ‘Ou te avatu fo‘i i tausaga ta‘itasi uma le sefulu ma le lima afe o sekeli auro, a‘i le tu‘ugā‘oloa o le tupu ‘ou te pule i ai;
41. a o tupe ‘ua totoe, e le‘i tu‘u mai e i latou sa pule i tupe i tausaga ‘ua mavae atu, latou te tu‘u atua mo galuega o le malumalu.
42. Ma le tasi, o sekeli ario e limagaafe sa vavae ‘ese i tupe o le malumalu i tausaga ta‘itasi uma, ‘ia pule i ai o ositaulaga e ‘au‘auna i le malumalu.
43. So se tasi fo‘i e sulufa‘i i le malumalu o lo‘o i Ierusalema ma lona lau‘ele‘ele ‘atoa uma, a o nofo sala o ia i luma o le tupu, so se ala e nofosala ai, e fa‘amāgaloina ai o ia; ‘ia tāofi pea fo‘i e ia o ana mea uma i totonu o lo‘u mālō.
44. “O galuega fo‘i e atiina a‘e ai pe teuina ai le malumalu, e maua ai le taui ai le tu‘ugā‘oloa a le tupu;
45. e togia fo‘i i ‘oloa a le tupu le atiina a‘e o pavali o Ierusalema ma le faiga o ‘olo e si‘omia a‘i; a fa‘apea fo‘i ‘ona fai i le atiina a‘e o pavali i Iuta.”
46. A ‘ua fa‘alogo Ionatana ma le nu‘u i ‘upu ia, ‘ua latou lē talitonu i ai, ‘ua latou lē talia lava, auā ‘ua latou manatua o mea matuā leaga na ia faia ‘iā Isaraelu, na na matuā fa‘atigā ai ‘iā te i latou.
47. Ma ‘ua latou loto malie ‘iā Alesana, auā o ia na mua‘i faia ‘upu o le filemū ‘iā te i latou; sa latou fesoasoani atu fo‘i ‘iā te ia i aso ta‘itasi uma.
48. Ma ‘ua fa‘apotopotoina e le tupu o Alesana le itūtau‘a tele lava ma ‘ua si‘i le tau‘a ‘iā Temetiu.
49. Ma ‘ua tau le tau‘a e tupu e to‘alua ma ‘ua sola le itūtau‘a a Temetiu; ma ‘ua tuliloa i latou e Alesana, ‘ua oso ‘iā te i latou.
50. Ma ‘ua matuā velavela le tau‘a se‘ia o‘o ‘ina goto le lā; ma ‘ua fasia o Temetiu i lea aso.
51. Ma ‘ua ‘auina atu e Alesana ‘iā Tulomaio, le tupu o Aikupito, o ana savali ma ‘upu nei, o fai atu:
52. “‘Ua ‘ou toe fo‘i mai i lo‘u mālō ma ‘ua ‘ou nofo i le nofoāli‘i o o‘u tamā ma ‘ua ‘ou maua le pule ma ‘ua ‘ou nutipalaina Temetiu, ‘ua ‘ou maua ai lo matou lau‘ele‘ele;