1. O Paulo, o le ‘au‘auna a le Atua, ma le ‘aposetolo a Iesu Keriso, ‘ona o le fa‘atuatua o ē ‘ua filifilia e le Atua, ma le iloa lelei o le ‘upu moni e i‘u ai i le amio Atua.
2. I le fa‘amoemoe i le ola fa‘avavau, na folafolaina mai talu mai tausaga o le vavau e le Atua e lē mafai ‘ona tala pepelo.
3. A ‘ua fa‘aalia mai lana lava afioga i ona pō e tatau ai i le tala‘iga ‘ua tu‘uina mai ‘iā te a‘u, e tusa ma le poloa‘iga a le Atua lo tatou Fa‘aola.
4. ‘Iā Tito lo‘u lava atali‘i i la le fa‘atuatua ‘ua tu‘u tele.‘Ia ‘iā te oe le alofa tunoa, ma le manuia mai le Atua le Tamā, ‘atoa ma Keriso Iesu lo tatou Fa‘aola.
5. O le mea lenei na ‘ou tu‘u ai oe i Kereta, ‘ina ‘ia e fa‘atonuina mea ‘ua totoe, ma ‘ia e tofia toeaina i lea ‘a‘ai ma lea ‘a‘ai, fa‘apei ‘ona ‘ou fai atu ai ‘iā te oe.
6. O se tasi e lē mata‘uleagaina, o le tane a le fafine e to‘atasi, e i ai ana fānau e fa‘atuatua, e le‘i ta‘ua i latou ‘ua ulavavale pe soli i tulafono.
7. Auā e tatau lava i le epikopō ‘ona lē mata‘uleagaina o ia, auā o ia le ‘au‘auna e tausi i mea a le Atua; e lē fīnau vale, e lē itagofie, e lē inu tele i uaina, e lē fasi tagata, e lē manumanu i ‘oloa.
8. A o lē alofa i tagata ‘ese, o lē alofa i ē amio lelei, o lē fa‘autauta, o lē amiotonu, o lē amio Atua, ma le amio mamā.