47. ‘Ua fa‘alogo ai nisi o ē nā tutū mai, ‘ona latou fa‘apea atu ai lea, “‘Ua vala‘au atu lenei tagata ‘iā Elia.”
48. ‘Ona momo‘e mai ai lea o le tasi o i latou ‘ua tago i le omomi, ‘ua fufui ai i le vineka, ma tu‘u i luga i le pito la‘au, ‘ua fa‘ainu ‘iā te ia.
49. A ‘ua fa‘apea ane i latou uma, “Tu‘u ai pea o ia, se‘i tatou iloa pe sau Elia na te fa‘aolaina o ia.”
50. ‘Ua toe ‘alaga Iesu ma le leo tele, ‘ona tu‘uina atu ai lea e ia o lona agaga.
51. Fa‘auta fo‘i, ‘ua saeluaina le ‘ie puipui o le malumalu, ‘ua amata ifo i luga ‘ua o‘o i lalo; ‘ua lūlūina fo‘i le ‘ele‘ele, ‘ua māvaevae fo‘i papa;
52. ‘ua avanoa fo‘i tu‘ugamau, ‘ua toe tutū mai fo‘i tino o tagata pa‘ia e to‘atele na momoe,
53. na mavae fo‘i lona toetū mai, ‘ona latou ō mai ai lea mai tu‘ugamau, ma latou ō atu i le ‘a‘ai pa‘ia, ‘ua iloa i latou e tagata e to‘atele.
54. O le ta‘ita‘i fo‘i o le to‘aselau ma ē na leoleo ‘iā Iesu fa‘atasi ma ia, na latou iloa le mafui‘e ma mea na faia, ‘ona latou matuā matata‘u ai lea, ‘ua fa‘apea ane, “E moni, o le Alo lava lenei o le Atua.”
55. Sa i ai fo‘i fafine e to‘atele na va‘ava‘ai mamao mai, o i latou ia na mulimuli mai ‘iā Iesu mai Kalilaia ma ‘au‘auna mai ‘iā te ia;
56. sa i ai ‘iā te i latou o Maria le Makatala, ma Maria le tinā o Iakopo ma Iosefa, o le tinā fo‘i o atali‘i o Sepetaio.
57. ‘Ua o‘o i le afiafi, ‘ona sau ai lea o le tasi tagata mau‘oa, o le Arimataia, e igoa ‘iā Iosefa, o ia fo‘i o le so‘o o Iesu;
58. ‘ua alu atu o ia ‘iā Pilato, ‘ua fa‘anoi atu ai i le tino o Iesu. ‘Ona fai atu ai lea o Pilato ‘ia tu‘u ane le tino.
59. ‘Ua ‘ave e Iosefa le tino, ‘ona aui ai lea i le ‘ie lino e mamā.
60. ‘Ua tu‘u ai i lona tu‘ugamau fou na foa i le papa; ‘ua fuli atu e ia le ma‘a tele i le gutu o le tu‘ugamau, ‘ona alu ai lea o ia.
61. Sa i ai Maria le Makatala ma le isi Maria, sa la nonofo feagai ma le tu‘ugamau.