21. ‘Ona fai atu ai lea o le ali‘i pule, ‘ua fa‘apea atu ‘iā te i latou, “O ai so lā‘ua tou te loto i ai ‘ou te tatalaina atu ‘iā te ‘outou?”‘Ona latou fai mai ai lea, “O Parapa.”
22. ‘Ona fai atu ai lea o Pilato ‘iā te i latou, “Se a fo‘i le mea ‘ou te faia ‘iā Iesu o lē ‘ua igoa ‘iā Keriso?”‘Ona fai mai ai lea o i latou uma ‘iā te ia, “‘Ia fa‘asatauroina o ia.”
23. A ‘ua fai atu le ali‘i, “Pe se a fo‘i se leaga ‘ua ia faia?”A ‘ua atili ai ‘ona ‘alalaga i latou, ‘ua fa‘apea mai, “‘Ia fa‘asatauroina o ia.”
24. ‘Ua iloa e Pilato, ‘ua lē aogā lana ‘upu, ‘ae atili ai le vāvāō, ‘ona tago ai lea o ia i le vai, ‘ua fafano ai ona lima i luma o le motu o tagata, ‘ua fa‘apea atu, “‘Ou te mamā a‘u i le toto o lenei tagata amiotonu faitalia lava ‘outou.”
25. ‘Ona tali mai ai lea o le nu‘u uma, ‘ua fa‘apea mai, “‘Ia i luga ‘iā i matou ma matou fānau lona toto.”
26. ‘Ona tatalaina atu ai lea e ia o Parapa ‘iā te i latou, a ‘ua sasaina e ia o Iesu ma tu‘uina atu o ia ‘ia fa‘asatauroina.
27. ‘Ua ta‘ita‘iina Iesu e le ‘au a le ali‘i pule i le maota o le ali‘i, ‘ona latou fa‘apotopotoina ai lea ‘iā te ia o le ‘au uma.
28. ‘Ua latou tō‘eseina ona ‘ofu, ‘ona latou fa‘a‘ofuina ai lea o ia i le ‘ofu mūmū.
29. ‘Ua latou ta‘ata‘ai fo‘i la‘au tuitui ‘ua fai a‘i le pale, ‘ona latou fa‘ae‘e ai lea i lona ao, ‘ua tu‘u fo‘i le ū i lona ‘a‘ao taumatau; ‘ona latou to‘otuli ai lea i ona luma ‘ua fa‘atauemu mai ‘iā te ia, ‘ua fa‘apea mai, “Talofa le tupu o tagata Iutaia!”
30. ‘Ua feanu i latou ‘iā te ia, ‘ona latou tago ai lea i le ū, ma tā i lona ao.
31. ‘Ua uma ‘ona latou fa‘atauemu mai ‘iā te ia ‘ona latou tatala ‘ese lea o le ‘ofu ma fa‘a‘ofu ‘iā te ia i ona lava ‘ofu; ‘ona latou ta‘ita‘i atu ai lea ‘iā te ia ‘ia fa‘asatauroina.
32. ‘Ua latou ō atu, ‘ona iloa ai lea e i latou o le tagata Kurene, e igoa ‘iā Simona, ‘ua latou fa‘atauānau ‘iā te ia ‘ia ‘ave lona satauro.
33. ‘Ua latou o‘o atu i le mea ‘ua igoa o Kolokota, o lona uiga, o le mea o i ai le ulupo‘o;
34. ‘ona latou avatu lea ‘iā te ia le uaina ‘ua fefiloi ma le la‘au ‘o‘ona, ‘ia inu ai; ‘ua tofotofo e ia, a ‘ua lē mafai ‘ona inu ai.
35. ‘Ua latou fa‘asatauro ‘iā te ia, ‘ona tufatufa ai lea e i latou o ona ‘ofu, ‘ua latou fai ai le vili.
36. ‘Ua latou nonofo i lea mea ‘ua leoleo ‘iā te ia.
37. ‘Ua latou tu‘u fo‘i i luga a‘e o lona ao le tusi i le mea na molia ai o ia, “O IESU LENEI, O LE TUPU O TAGATA IUTAIA.”
38. ‘Ona latou fa‘asatauro lea fa‘atasi ma ia tagata fao mea e to‘alua, o le tasi i le itū taumatau, ma le tasi i le itū tauagavale.
39. ‘Ua fāifai ‘iā te ia o ē na ui ane ma lialia‘i o latou ulu,
40. ‘ua fa‘apea mai, “O oe nā, o lē lepeti i le malumalu, ma toe faia i aso e tolu, ‘inā fa‘aola ia oe ‘iā te oe. ‘Āfai o oe o le Alo o le Atua, ‘inā alu ifo ia i le satauro.”