1. ‘Ona toe sauni ai lea e Iesu o fa‘ata‘oto, ‘ua fa‘apea atu ‘iā te i latou,
2. “E tusa le mālō o le lagi ma le tasi tupu ‘ua na faia le tausama‘aga o lona atali‘i;
3. ‘ua ‘a‘auina atu e ia ana ‘au‘auna e fai atu i ē na tala‘iina, ‘ia ō mai i le tausama‘aga; a ‘ua latou lē mafafai ‘ona ō mai.
4. ‘Ua toe ‘a‘auina atu e ia nisi ‘au‘auna, ‘ua fa‘apea atu, ‘‘Ia ‘outou fai atu i ē na tala‘iina: Fa‘auta, ‘ua ‘ou saunia mea taumafa, ‘ua fafasi a‘u povi ma a‘u manu pepeti, ‘ua saunia fo‘i mea uma; ‘inā ō mai ia i le tausama‘aga.’
5. A ‘ua latou lē fia ō mai, ‘ua ta‘itasi ma alu o le tasi i lona fanua, ma le tasi i lana fa‘atau.
6. A o isi, ‘ua latou pupu‘e i ana ‘au‘auna, ‘ua fa‘aleaga ma fasiotia.
7. ‘Ua fa‘alogo ai le tupu, ‘ona matuā ita ai lea o ia; ‘ua ‘a‘auina atu e ia ana ‘au, ‘ua fa‘aumatia na tagata fasi tagata ma susunu la latou ‘a‘ai.
8. ‘Ona fai atu ai lea o ia i ana ‘au‘auna, ‘‘Ua saunia lava le tausama‘aga, a ‘ua lē aogā i ē na tala‘iina.
9. O lenei, ‘ia ‘outou ō atu i ala tele, o i latou uma tou te iloa ai, tou te tala‘i i ai le tausama‘aga.’
10. ‘Ona ō atu ai lea o ia ‘au‘auna i ala, ‘ua latou fa‘apotopoto uma ē na latou iloa, o ē leaga ‘atoa ma ē lelei; ‘ona tumu ai lea o le mea na fai ai le tausama‘aga i ē na ta‘o‘oto e ‘a‘ai ai.
11. “‘Ona ulufale atu ai lea o le tupu e va‘ava‘ai atu i ē na ta‘o‘oto e ‘a‘ai ‘ua iloa atu ai e ia o le tasi tagata ‘ua lē ‘ofu i le ‘ofu o le tausama‘aga.
12. ‘Ona fai atu ai lea o le tupu ‘iā te ia, ‘Sole, pe fa‘apefea ‘ona e ulufale mai ‘i‘inei ‘ua lē ‘iā te oe le ‘ofu o le tausama‘aga?’ ‘Ona lē gagana ai lea o ia.
13. ‘Ona fai atu ai lea o le tupu i ‘au‘auna, ‘‘Ia ‘outou fusifusia ona vae ma ona lima, ma ‘ave o ia ma lafo i le pouliuli i fafo, e i ai le taufaitagiauē ma le lilivau o nifo.’
14. Auā e to‘atele e ‘ua tala‘iina ‘ae to‘aitiiti ē ‘ua filifilia.”