19. A o Iesu ‘ua lē mafai, a ‘ua fetalai atu ‘iā te ia, “Alu atu ia oe i lou fale, i lou ‘āiga, ma ‘ia e ta‘u atu ‘iā te i latou mea tetele ‘ua faia e le Ali‘i ‘iā te oe, ma lona alofa ‘iā te oe.”
20. ‘Ua alu fo‘i o ia ma na tala‘i i Tekapoli o mea tetele ‘ua faia e Iesu ‘iā te ia; ‘ona ofo ai lea o tagata uma.
21. ‘Ua toe fo‘i atu Iesu i le va‘a i le tasi itū, ‘ona potopoto mai lea o le motu o tagata e to‘atele ‘iā te ia, sa latalata ane o ia i le vai.
22. Fa‘auta fo‘i, na sau le tasi o ē pule i le sunako, o Iairo lona igoa; ‘ua na iloa o ia, ‘ona fa‘apa‘ū ai lea i ona vae;
23. ‘ua ia matuā ‘ai‘oi mai fo‘i ‘iā te ia, ‘ua fa‘apea mai, “O le a oti nei lava si o‘u afafine, ‘inā e maliu atu ma ‘ia e fa‘ae‘e ou ‘a‘ao i luga ‘iā te ia e mālōlō ai, ‘ona ola ai lea o ia.”
24. ‘Ona la maliu atu lea ma ia; na mulimuli atu fo‘i ‘iā te ia le motu o tagata e to‘atele, ma latou fetaomi lava ‘iā te ia.
25. O le tasi fafine fo‘i, ‘ua ‘iā te ia le puna toto i tausaga e sefulu ma le lua,
26. e tele fo‘i mea na ia tigā ai i foma‘i e to‘atele, ‘ua uma atu ai fo‘i ana ‘oloa, ‘ae le‘i aogā lava ‘iā te ia, ‘ae peita‘i ‘ua atili ai lona ma‘i,
27. ‘ua fa‘alogo o ia ‘iā Iesu, ‘ona alu ane lea i ona tua, i totonu lava o le motu o tagata, na pa‘i ane i lona ‘ofu;
28. auā na fa‘apea o ia, “‘Āfai ‘ou te pa‘i atu tau lava o ona ‘ofu, ‘ona ‘ou mālōlō ai lea.”
29. ‘Ona utu loa lea o lona puna toto; ‘ona iloa lea e ia lona tino ‘ua fa‘amālōlōina i lona ma‘i tigā.
30. ‘Ua silafia loa e Iesu i lona lava finagalo, ‘ua alu atu le mana nai ‘iā te ia ‘ona fāliu lea o ia i le motu o tagata, ‘ua fa‘apea atu, “Po o ai ‘ea na pa‘i mai i o‘u ‘ofu?”
31. ‘Ona fai mai lea o ona so‘o ‘iā te ia, “‘Ua e silafia le motu o tagata, o lo‘o fetaomi mai i latou ‘iā te oe, a ‘e te fetalai mai ‘ea, ‘Po o ai na pa‘i mai ‘iā te a‘u?’”
32. ‘Ua silasila solo fo‘i o ia ‘ina ‘ia silafia lē na faia lea mea.
33. A o le fafine, na mata‘u ma gatete, ‘ua na iloa le mea ‘ua faia ‘iā te ia, ‘ua sau ma fa‘apa‘ū o ia i ona luma, ma ta‘utino atu le tonu ‘iā te ia.
34. A ‘ua fetalai atu Iesu ‘iā te ia, “Lo‘u afafine e, ‘ua e ola i lou fa‘atuatua; ‘inā alu ia oe ma le manuia ma ‘ia e mālōlō i lou ma‘i tigā.”
35. ‘Ua ō mai nisi mai le fale o lē ‘ua pule i le sunako, a o fetalai mai o ia, ‘ua fa‘apea mai i latou, “‘Ua oti lou afafine; se a le mea ‘e te fa‘alavelave ai pea i le a‘oa‘o?”