14. O le mea na pa‘ū i le vao tuitui, o i latou ia ē ‘ua fa‘alogo, ‘ua ō atu ai, ‘ona fētina‘iina ai lea i mea e popole ai, ma ‘oloa, ma mea fa‘afiafia o le olaga nei, ‘ona lē o‘o lea ‘ina matua o latou fua.
15. Peita‘i o le mea na i le ‘ele‘ele lelei, o i latou ia ē ‘ua fa‘alogo i le ‘upu, ma tausi i ai i le loto ‘ua fa‘amaoni ma le lelei, ‘ona fua mai ai lea ma le ‘onosa‘i.
16. “E leai se tagata na te tutu se molī, ma ufiufi ai i le tanoa, pe tu‘u i lalo o le moega; ‘ae tu‘u i luga o le tu‘ugāmolī, ‘ina ‘ia iloa atu le malamalama e i latou ‘ua ulufale mai.
17. “Auā e leai se mea lilo e lē fa‘aalia; e leai fo‘i se mea natia e lē fa‘ailoa, ‘ae i‘u ‘ina fa‘aalia.
18. O lenei, ‘ia ‘outou, pe fa‘apefea lo ‘outou fa‘alogo; auā o sē ‘ua i ai mea, e foa‘iina mai ‘iā te ia; a o sē ‘ua lē i ai mea, e ‘ave‘eseina ‘iā te ia o mea ‘ua peiseaī ‘ua ‘iā te ia.”
19. ‘Ua ō mai ‘iā te ia lona tinā ma ona uso, a ‘ua lē sao mai ‘iā te ia ‘ona o le motu o tagata.
20. ‘Ua fai mai nisi ‘iā te ia, “‘Ua tutū lou tinā ma ou uso i fafo, ‘ua fia feiloa‘i ma oe.”
21. ‘Ua tali atu o ia, ‘iā te i latou, “O ē fa‘alogo i le afioga a le Atua ma latou faia, o lo‘u tinā ma o‘u uso lava ia.”
22. ‘Ua maliu a‘e o ia ma ona so‘o i le tasi aso i le va‘a; ‘ua fetalai atu fo‘i o ia ‘iā te i latou, “Tatou ō ia i le tasi itū vai.” ‘Ona latou tu‘uva‘a atu lea.
23. ‘Ua alu lo latou va‘a, ‘ae tofā o ia, ‘ona tō ifo lea o le afā i le vai, ‘ua osofia lo latou va‘a, e mata a tupu le fa‘alavelave.
24. ‘Ona latou ō ane lea ‘ua fafagu ‘iā te ia, ‘ua fa‘apea mai, “Le Ali‘i e, le Ali‘i e, o le a matou fano.”‘Ona tu lea o ia, ‘ua vavao i le matagi ma peau o le vai; ‘ona mavae ai lea, ‘ua malū.
25. ‘Ua fetalai atu o ia ‘iā te i latou, “O ifea ‘ea lo ‘outou fa‘atuatua?”‘Ua matata‘u lava i latou ma ofo; ‘ua fetautalatala‘i i latou, “O ai ‘ea lenei? Auā ‘ua fetalai o ia i le matagi ma le vai, ‘ona usiusita‘i ai lea ‘iā te ia.”
26. ‘Ua latou o‘o atu i le lau‘ele‘ele o Katara, o le itū vai lea ‘ua feagai ma Kalilaia.