22. “‘Ua tu‘uina mai mea uma ‘iā te a‘u e lo‘u Tamā; e leai se tasi ‘ua iloa le Atali‘i, ‘ua nā o le Tamā; e leai fo‘i se tasi ‘ua iloa le Tamā, ‘ua nā o le Atali‘i ma sē ‘ua loto le Atali‘i e fa‘aali atu i ai.”
23. ‘Ua fāliu Iesu i ona so‘o ma fetalai lemū ane, “‘Amu‘ia mata ‘ua iloa mea tou te iloa,
24. auā ‘ou te fai atu ‘iā te ‘outou, e to‘atele perofeta ma tupu na fia matamata i nei mea ‘ua ‘outou iloa, a ‘ua latou lē iloa lava; na latou fia fa‘alogo fo‘i i nei mea ‘ua ‘outou fa‘alogo i ai, ‘ae le‘i fa‘alogo ai lava.”
25. Fa‘auta fo‘i, ‘ua tula‘i le tasi o a‘oa‘o tulafono ma tofotofo ‘iā Iesu, ‘ua fa‘apea mai, “Le a‘oa‘o e, se a se mea ‘ou te faia ‘ina ‘ia ‘ou maua ai le ola e fa‘avavau?”
26. ‘Ua fetalai atu Iesu ‘iā te ia, “O le a ‘ea ‘ua tusia i le tulafono? O le a lau faitau?”
27. ‘Ua tali mai o ia, ‘ua fa‘apea mai, “‘E te alofa atu i le Ali‘i lou Atua ma lou loto ‘atoa ma lou agaga ‘atoa ma lou malosi ‘atoa ma lou manatu ‘atoa; ‘e te alofa atu fo‘i i lē lua te tuā‘oi, ‘ia pei o oe lava ‘iā te oe.”
28. ‘Ona fa‘apea atu lea o Iesu ‘iā te ia, “‘Ua tonu lau tali; ‘ia e fa‘apea ‘ona fai, ‘e te ola ai.”
29. A ‘ua fa‘afiatonu o ia, ‘ua fai mai ‘iā Iesu. “O ai fo‘i le tagata ma te tuā‘oi?”
30. ‘Ua tali atu Iesu, “O le tasi tagata na alu ifo mai Ierusalema i Ieriko, ‘ua maua o ia e tagata faomea; ‘ua latou tō‘eseina ona ‘ofu, ma fasi ‘iā te ia, ‘ua latou ō ‘ua tu‘ua o ia, ‘ua tāli oti.
31. ‘Ua so‘ona alu ifo le tasi ositaulaga i lea ala; ‘ua iloa atu ‘iā te ia, ‘ona ui ane lea o ia i le tasi itū ala.
32. ‘Ua fa‘apea fo‘i le sa Levī, ‘ua o‘o i lea mea, ‘ua alu ane ma matamata i ai; ‘ona ui ane fo‘i lea o ia i le tasi itū ala.
33. A o le tasi Samaria ‘ua alu lana malaga, ‘ua o‘o atu i le mea o i ai o ia, ‘ua iloa o ia, ‘ona mutimutivale lea o lona alofa;
34. ‘ua alu atu, ma fusifusi i ona manu‘a, ‘ua liligi fo‘i i ai le suāu‘u ma le uaina; ‘ua fa‘ati‘eti‘e ‘iā te ia i lana lava manu ma ta‘ita‘i ‘iā te ia i le fale talimālō ma tausi ‘iā te ia.
35. O le taeao, ‘ua ia tō a‘e ai tenari e lua ma avatu i lē e pule i le fale talimālō, ‘ua fai atu ‘iā te ia, ‘‘Inā e tausi ‘iā te ia; ‘ai se mea ‘e te toe fa‘atau ai, ‘ou te taui atu ‘iā te oe pe a ‘ou toe sau.’
36. O le a sou manatu, o ai o latou nei o le to‘atolu ‘ua fai ma tagata la te tuā‘oi ma lē na maua e tagata faomea?”
37. ‘Ua fai mai o ia, “O lē na alofa atu ‘iā te ia.”‘Ona fa‘apea atu ai lea o Iesu ‘iā te ia, “‘Inā alu ia ma ‘ia e fa‘apea ‘ona fai.”
38. ‘Ua latou ō, ‘ona afe atu lea o ia i le tasi ‘a‘ai, o le tasi fafine fo‘i e igoa ‘iā Mareta, ‘ua na talia o ia i lona fale.
39. O lona uso fo‘i e igoa ‘iā Maria, ‘ua nofo o ia i lalo i tafatafa o vae o Iesu ma fa‘alogo i lana fetalaiga.
40. A ‘ua tigā Mareta i le fatu‘āiga ‘ua tu mai ma fa‘apea mai, “Le Ali‘i e, ‘e te lē manatu mai ‘ea, ‘ina ‘ua tu‘u mai e lo‘u uso ‘iā te a‘u e sauni to‘atasi? ‘ia e fetalai ane ‘iā te ia, ‘ia fesoasoani mai ‘iā te a‘u.”