58. ‘Ua fa‘alogo ē ‘ua latou tuā‘oi ‘atoa ma lona ‘āiga, ‘ua alofa tele mai le Ali‘i ‘iā te ia ‘ona ‘oli‘oli ai lea o i latou fa‘atasi ma ia.
59. ‘Ua o‘o i le aso valu, ‘ona ō mai lea o i latou e peritome ai le tama, o le a fa‘aigoa e i latou ‘iā te ia i le igoa o lona tamā, o Sakaria.
60. A ‘ua fai atu lona tinā ‘ua fa‘apea atu, “‘Aua; e igoa lava o ia ‘iā Ioane.”
61. ‘Ona latou fai mai lea ‘iā te ia, “E leai se tasi o lo‘u ‘āiga e igoa i lea igoa.”
62. ‘Ua latou genogeno atu i lona tamā, pe se a lona loto i sona igoa.
63. ‘Ona fai ane lea o ia i se papatusi e ‘aumai, ‘ona tusi ai lea e ia, ‘ua fa‘apea, “O Ioane lona igoa.” ‘Ona latou ofo uma ai lea.
64. ‘Ona matala loa lea o lona gutu ma lona laulaufaiva, ‘ua tautala lea o ia, ma fa‘afetai i le Atua.
65. ‘Ua o‘o ai le mata‘u i ē ‘ua latou tuā‘oi uma, ‘ua so‘o fo‘i le atu mauga uma, o Iutaia i le tala i nei mea uma.
66. O i latou uma na fa‘alogo ai ‘ua mānatunatu i ai, ‘ua fa‘apea ane, “Pe i‘u la ‘ina fa‘apefea lenā tama?” Auā ‘ua ‘iā te ia le ‘a‘ao o le Ali‘i.
67. ‘Ua fa‘atumuina Sakaria lona tamā i le Agaga Pa‘ia, ‘ona perofeta ane ai lea o ia, ‘ua fa‘apea ane:
68. “‘Ia vi‘ia le Ali‘i le Atua o Isaraelu,‘ina ‘ua asiasi mai o ia ma togiolaina lona nu‘u.
69. Ma ‘ua fa‘atūina le fa‘aolataga mamanamo i tatou i le ‘āiga o lana ‘au‘auna o Tavita.
70. Fa‘apei ‘ona fetalai mai o ia i fofoga o ana perofeta pa‘ia talu mai anamua,
71. ‘ina ‘ia fa‘aolaina i tatou mai ē ‘ua fai i tatou ma fili,mai lima fo‘i o ē ‘ino‘ino mai ‘iā te i tatou.
72. E faia le alofa ‘ua folafolaina mai i o tatou tamāe manatua fo‘i lana feagaiga pa‘ia;
73. le tautoga na ia tautō ai,‘iā Aperaamo lo tatou tamā.
74. E foa‘i mai ‘ina ‘ia lavea‘iina i tatou mai lima o ē ita mai,tatou te lē fefefe ai, ‘ae ‘au‘auna ‘iā te ia,
75. ma le pa‘ia ma le amiotonu,i ona luma i aso uma o lo tatou ola.
76. O oe fo‘i le tama, e tā‘ua oe o le perofeta o le Silisili‘ese, auā ‘e te muamua atu i luma o le Ali‘i,e sauni i ona ala;