26. O le ono o masina ‘ua ‘auina mai ai e le Atua o le agelu o Kaperielu i le ‘a‘ai o Kalilaia, o Nasareta le igoa,
27. i le taupou o le ‘āiga o Tavita, ‘ua faufautane i le tagata e igoa ‘iā Iosefa; o Maria fo‘i le igoa o le taupou.
28. ‘Ua ulufale mai le agelu ‘iā te ia ‘ona fa‘apea mai lea o ia, “Si ‘ou alofa ‘iā te oe lē ‘ua alofaina, ‘ua ‘iā te oe le Ali‘i.”
29. A ‘ua atuatuvale o ia i lana ‘upu, ‘ua taumanatunatu fo‘i o ia, pe se a le uiga o lenei alofa‘aga.
30. ‘Ua fai mai fo‘i le agelu ‘iā te ia, “Maria e, ‘aua ‘e te fefe; auā ‘ua alofaina mai oe e le Atua.
31. Fa‘auta fo‘i, o le a tō oe, ma e fānauina se tama tane, ‘e te fa‘aigoa ‘iā te ia o Iesu.
32. E sili o ia, e ta‘ua fo‘i o le Alo o le Silisili‘ese; e foa‘i atu e le Ali‘i le Atua ‘iā te ia le nofoa‘iga a Tavita lona tamā.
33. E fai o ia ma tupu i le ‘āiga o Iakopo e fa‘avavau; o lona mālō fo‘i e leai sona gata‘aga.”
34. ‘Ona fai atu lea o Maria i le agelu, “A fa‘apefea le mea nei; auā ‘ou te lē iloa se tane?”
35. ‘Ua tali mai le agelu, ‘iā te ia, “E afio ifo le Agaga Pa‘ia i luga ‘iā te oe, e fa‘amalumalu ifo fo‘i ‘iā te oe le mana o lē Silisili‘ese; o le mea lea e ta‘ua ai le tama pa‘ia e fānau mai, o le Alo o le Atua.
36. Fa‘auta fo‘i, o lou ‘āiga o Elisapeta, ‘ua tō o ia ‘ina ‘ua lo‘omatua, o le tama tane fo‘i lana tama; o le onoga masina lenei i lē ‘ua ta‘ua e pā.
37. Auā e leai lava se mea e tasi e lē mafaia e le Atua.”
38. ‘Ua fai atu Maria, “Fa‘auta, o a‘u nei o le ‘au‘auna a le Ali‘i; ‘ia faia ‘iā te a‘u e tusa ma lana fetalaiga.” ‘Ona alu ‘ese ai lea o le agelu ‘iā te ia.
39. ‘Ua tula‘i Maria i ia ona aso, ‘ua fa‘atelevave atu i le atu mauga, i le tasi ‘a‘ai o Iuta;
40. ‘ua ulu atu fo‘i o ia i le fale o Sakaria, ma alofa atu ‘iā Elisapeta.