9. Fa‘apei ‘ona alofa mai o le Tamā ‘iā te a‘u, e fa‘apea lava ‘ona ‘ou alofa atu ‘iā te ‘outou; ‘ia tumau pea ‘outou i lo‘u alofa.
10. ‘Āfai tou te tausia a‘u poloa‘iga, ‘ona tumau lea o ‘outou i lo‘u alofa; pei ‘ona ‘ou tausia poloa‘iga a lo‘u Tamā, ma ‘ou tumau i lona alofa.
11. ‘Ua ‘ou fai atu nei mea ‘iā te ‘outou, ‘ina ‘ia tumau ai lo‘u ‘oli‘oli ‘iā te ‘outou, ‘ia ‘ato‘atoa fo‘i lo ‘outou ‘oli‘oli.
12. “O la‘u poloa‘iga lenei, ‘ia ‘outou fealofani, pei ‘ona ‘ou alofa atu ‘iā te ‘outou.
13. E lē sili lava le alofa o se tasi i lenei alofa, ‘ia tu‘uina atu e se tasi lona ola e sui ai ana uō.
14. O a‘u uō ‘outou, pe ‘āfai tou te faia mea, uma lava ‘ou te fai atu ai ‘iā te ‘outou.
15. ‘Ou te lē toe ta‘ua ‘outou o ‘au‘auna, auā e lē iloa e le ‘au‘auna le mea e faia e lona ali‘i; a ‘ua ‘ou ta‘ua ‘outou o uō, auā ‘ua ‘ou fa‘ailoa atu ‘iā te ‘outou mea uma na ‘ou fa‘alogo ai i lo‘u Tamā.
16. Tou te le‘i filifilia a‘u, ‘ae na ‘ou filifilia ‘outou ma ‘ou tu‘uina atu ‘outou, ‘ia ‘outou ō ma ‘ia ‘outou fua mai ni fua, ma ‘ia tumau o ‘outou fua; ‘ina ‘ia foa‘iina atu ‘iā te ‘outou e le Tamā mea uma lava tou te ole atu ai ‘iā te ia i lo‘u igoa.
17. O la‘u poloa‘iga lenei ‘iā te ‘outou, ‘ia ‘outou fealofani.
18. “‘Āfai e ‘ino‘ino mai le lalolagi ‘iā te ‘outou, ‘ua ‘outou iloa ‘ua muamua ‘ona ‘ino‘ino mai ‘iā te a‘u.
19. ‘Āfai a ni tagata o le lalolagi ‘outou, po ‘ua alofa mai le lalolagi i ona tagata; ‘ae lē ni o le lalolagi ‘outou, a ‘ua ‘ou filifilia ‘outou nai le lalolagi, o le mea, lea e ‘ino‘ino ai le lalolagi ‘iā te ‘outou.
20. ‘Ia ‘outou manatua le ‘upu na ‘ou fai atu ai ‘iā te ‘outou, ‘E lē sili le ‘au‘auna i lona ali‘i.’ ‘Āfai ‘ua latou fa‘asauā mai ‘iā te a‘u, e fa‘asauā fo‘i ‘iā te ‘outou; ‘āfai ‘ua latou tausia la‘u ‘upu, latou te tausia fo‘i la ‘outou.