35. ‘Ona fetalai atu lea o Iesu ‘iā te i latou, “E toe itiiti nai aso e i ai ‘iā te ‘outou le malamalama; sāvavali ia manū o ‘iā te ‘outou le malamalama, ne‘i maua ‘outou e le pogisā; o lē savali i le pogisā e lē iloa e ia le mea e alu i ai.
36. ‘Ia ‘outou talia le malamalama, manū o ‘iā te ‘outou le malamalama, ‘ina ‘ia ‘avea o ‘outou ma fānau a le malamalama.”‘Ua fetalai atu ia mea e Iesu, ‘ona maliu ane lea o ia ‘ua lafi ‘iā i latou.
37. ‘Ua ia faia fa‘ailoga, e tele lava i o latou luma, ‘ae le‘i fa‘atuatua i latou ‘iā te ia,
38. ‘ina ‘ia taunu‘u ai le ‘upu a Isaia le perofeta, ‘ua ia fa‘apea mai:“Le Ali‘i e, o ai ‘ea ‘ua talitonu i la matou ‘upu e taulogologo atu?‘Ua fa‘aalia fo‘i ‘iā te ai le ‘a‘ao o le Ali‘i?”
39. O lenei, e lē mafai e i latou ‘ona talitonu, auā ‘ua toe fa‘apea mai Isaia:
40. “‘Ua ia fa‘atauasoina o latou mata,ma na fa‘ama‘a‘aina o latou loto,ne‘i va‘ai o latou mata,ma lagona o latou loto,ne‘i liliuina fo‘i i latou,ma fa‘amālōlōina i latou.”
41. Na fai mai ia ‘upu e Isaia ‘ina ‘ua va‘ai atu o ia i lona mamalu ma tautala mai ‘iā te ia.
42. ‘Ae peita‘i e to‘atele ali‘i ‘ua fa‘atuatua ‘iā te ia; ‘ae le‘i ta‘u atu ai, ‘ona o le ‘au faresaio, ne‘i tulia i latou i le sunako.
43. Auā ‘ua sili lo latou mana‘o i le vi‘iga mai tagata, i le vi‘iga mai le Atua.
44. ‘Ua ‘alaga atu Iesu, ‘ua fetalai atu, “O lē fa‘atuatua mai ‘iā te a‘u, e lē fa‘atuatua mai o ia ‘iā te a‘u ‘ae ‘iā te ia ‘ua ‘auina mai a‘u.
45. O lē va‘ai mai fo‘i ‘iā te a‘u, e va‘ai atu o ia ‘iā te ia ‘ua ‘auina mai a‘u.
46. ‘Ua ‘ou sau o le malamalama i le lalolagi, ‘ina ‘ia lē tumau pea i le pouliuli se tasi e fa‘atuatua mai ‘iā te a‘u.
47. ‘Āfai fo‘i e fa‘alogologo se tasi i a‘u ‘upu, ‘ae lē talitonu i ai, ‘ou te lē fa‘amasino ‘iā te ia; auā ‘ou te le‘i sau e fa‘amasino i le lalolagi, a ‘ia ‘ou fa‘aolaina le lalolagi.
48. O lē fa‘alēaogā ‘iā te a‘u, ma ‘ua lē talia a‘u ‘upu, o ‘iā te ia le tasi na te fa‘amasinoina o ia; o le ‘upu ‘ua ‘ou tautala atu ai, e fa‘amasino lea ‘iā te ia i le aso gata‘aga.
49. Auā ‘ou te lē tautala fua na o a‘u; a o le Tamā ‘ua ‘auina mai a‘u, na ia tu‘u mai le poloa‘iga ‘iā te a‘u i mea ‘ou te fai atu ai, ma mea ‘ou te tautala atu ai.
50. ‘Ua ‘ou iloa fo‘i o lana poloa‘iga o le ola fa‘avavau lea. O lenei, o mea ‘ou te tautala atu ai, fa‘apei ‘ona fetalai mai ai le Tamā ‘iā te a‘u, e fa‘apea ‘ona ‘ou tautala atu ai.”#