15. “‘Aua ‘e te fefe, o oe le tama fafine a Siona; Fa‘auta, e afio mai lou Tupu,o lo‘o ti‘eti‘e i le tama‘i asini.”
16. ‘Ua lē iloa e ona so‘o ia mea i le taimi lava lea; ‘ae ‘ina ‘ua o‘o Iesu i lona mamalu, ‘ona latou manatua lea ‘ua tusia ia mea ‘iā te ia; ‘ua latou faia fo‘i ia mea ‘iā te ia.
17. ‘Ona molimau ai lea o le motu o tagata sa latou i ai ma ia, ‘ina ‘ua vala‘auina e ia o Lasalo nai le tu‘ugamau, ma toe fa‘atū mai ‘iā te ia nai ē ‘ua oti.
18. O le mea lea ‘ua fa‘afetaia‘i ai ‘iā te ia le motu o tagata, auā ‘ua latou fa‘alogo atu na ia faia lenā fa‘ailoga.
19. ‘Ona fetautalatala‘i ai lea o le ‘au faresaio, “Tou te lē iloa ‘ea, ‘ua lē aogā sa tatou mea e fai? Fa‘auta, ‘ua mulimuli atu le lalolagi ‘iā te ia.”
20. Sa i ai isi tagata Eleni fa‘atasi ma ē na ō a‘e i le tausamiga e tapua‘i.
21. O i latou ia na ō ane ‘iā Filipo o le Petesaita i Kalilaia o ia, ‘ua latou ole atu ‘iā te ia, ‘ua fa‘apea atu, “Le ali‘i e, matou te fia feiloa‘i ma Iesu.”
22. ‘Ona alu ane lea o Filipo, ‘ua ta‘u atu ‘iā Aneterea; ‘ona ta‘u atu ai lea e Aneterea ma Filipo ‘iā Iesu.
23. ‘Ua tali atu Iesu ‘iā te i lā‘ua, ‘ua fa‘apea atu, “‘Ua o‘o mai ona po e o‘o ai le Atali‘i o le tagata i lona mamalu.
24. E moni, e moni, ‘ou te fai atu ‘iā te ‘outou, ‘Āfai e pa‘ū le fua o le saito i le ‘ele‘ele ma pala ai, e tumau pea o le mea e tasi; ‘ae ‘āfai e pala, ‘ona fua tele mai ai lea.
25. O lē fa‘apelepele i lona ola, e fa‘amaumau e ia i ai; a o lē ‘ino‘ino i lona ola i lenei lalolagi, e maua ai pea e ia e o‘o i le ola fa‘avavau.
26. A fia ‘au‘auna mai se tasi ‘iā te a‘u, ‘ia mulimuli mai o ia ‘iā te a‘u; o le mea ‘ou te i ai, e i ai fo‘i la‘u ‘au‘auna; pe a ‘au‘auna mai fo‘i se tasi ‘iā te a‘u, ‘ona vi‘ia lea o ia e le Tamā.
27. “O lo‘o ātu ne‘i lo‘u loto, pe se a fo‘i se tala ‘ou te fai atu? ‘Lo‘u Tamā e, fa‘aola mai ‘iā te a‘u a‘i lenei itū aso; a o le mea lava lea na ‘ou o‘o mai ai i lenei itū aso.’
28. Lo‘u Tamā e, ‘ia e tu‘uina atu le mamalu i lou suafa.”‘Ona o‘o mai ai lea o le si‘ufofoga mai le lagi, “‘Ua ‘ou tu‘uina atu le mamalu, ‘ou te toe tu‘uina atu fo‘i i ai le mamalu.”
29. ‘Ona fa‘apea ai lea o le motu o tagata sa tutū ma fa‘alogologo i ai, o lo‘o ‘ua faititili; a ‘ua fai mai nisi, “‘Ua fetalai se agelu ‘iā te ia.”
30. ‘Ona fetalai atu lea o Iesu, ‘ua fa‘apea atu, “E le‘i o‘o mai lenei si‘ufofoga ‘ona o a‘u, a ‘ona o ‘outou.
31. O lo‘o fa‘amasinoina nei lenei lalolagi; e tulia nei le ali‘i o lenei lalolagi.
32. O a‘u fo‘i, ‘āfai e si‘itia a‘u ai le ‘ele‘ele, ‘ou te tōsina uma mai tagata ‘iā te a‘u.”