18. ‘Aua fo‘i ne‘i ‘onā ‘outou i le uaina, o le mea e ulavale ai; a ‘ia fa‘atumuina ‘outou i le Agaga.
19. ‘Ia ‘outou fetautalatala‘i i salāmo, ma pese, ma siva fa‘aleagaga, ‘ia fa‘ane‘ene‘e atu ma pepese atu i le Ali‘i i o ‘outou loto.
20. ‘Ia fa‘afetai pea lava ‘ona o mea uma i le Atua le Tamā, i le suafa o lo tatou Ali‘i o Iesu Keriso.
21. ‘Ia usiusita‘i le tasi i le tasi ma le mata‘u ‘iā Keriso.
22. O ‘outou fafine, ‘ia ‘outou usiusita‘i ‘iā ‘outou lava tane, fa‘apei ‘ona usiusita‘i i le Ali‘i.
23. Auā o le tane o le ulu ia o le avā, e pei o Keriso fo‘i o le ulu ia o le ekalesia, o ia fo‘i o le Fa‘aola o le tino.
24. O lenei, fa‘apei ‘ona usiusita‘i o le ekalesia ‘iā Keriso, ‘ia fa‘apea fo‘i fafine ‘iā latou lava tane i mea uma lava.
25. O ‘outou tane, ‘ia ‘outou alolofa atu ‘iā ‘outou lava avā, fa‘apei o Keriso fo‘i ‘ona alofa mai i le ekalesia, ma foa‘iina mai o ia e ia e fai mōna sui.
26. ‘Ina ‘ia fa‘apa‘iaina ai, ‘ina ‘ua fa‘amamāina i le fa‘atā‘eleina i le vai ‘atoa ma le ‘upu;
27. ‘ina ‘ia na tu‘uina atu o ia, ‘iā te ia, o le ekalesia matagofie lava, e leai sona ila, po o se ma‘anuminumi, po o se tasi mea fa‘apenā, a ‘ia pa‘ia ma ‘ia lē ponā.
28. O lo‘o fa‘apea ‘ona tatau ‘ona alolofa o tane ‘iā latou lava avā, fa‘apei o latou lava tino; o lē alofa i lana lava avā, o lo‘o alofa o ia ‘iā te ia lava;
29. auā e leai lava se tasi e ita i lona lava tino; ‘ae peita‘i na te fafaga ma tausi atu i ai, fa‘apei o le Ali‘i fo‘i ‘ona tausi i le ekalesia,
30. auā o itū lava i tatou o lona tino.
31. “O le mea lea e tu‘ua ai e le tane o lona tamā ma lona tinā, ‘ae fa‘atasi ma lana avā, ‘ona ‘avea ai lea o i lā‘ua o le tino e tasi.”
32. O le mea lilo tāua tele lenei; a ‘ou te talaina atu nei e uiga ‘iā Keriso ‘atoa ma le ekalesia.
33. A o ‘outou, ‘ia ta‘itasi ‘outou ma alofa i lana lava avā fa‘apei o ia lava ‘iā te ia; o le fafine fo‘i ‘ia āva o ia i lana tane.