1. O pologa uma o ē o i lalo o le amo, ‘ia latou manatu e tatau ‘ona āva lava i o latou lava matai ‘ina ne‘i ‘upuleagaina le suafa o le Atua ma lana a‘oa‘oga.
2. A o i latou ‘ua i ai matai fa‘atuatua, ‘aua ne‘i latou ta‘ufa‘atauva‘aina i latou, auā o uso i latou; a ‘ia atili ‘ona ‘au‘auna i ai, auā ‘ua fa‘atuatua ma ‘ua alofaina i latou ē ‘ua talia le galuega lelei. ‘Ia e a‘oa‘o atu ma apoapoa‘i atu i ia mea.
3. ‘Āfai e a‘oa‘o ‘ese se tasi, ma le lē gaua‘i i ‘upu e ola ai a lo tatou Ali‘i o Iesu Keriso, ma a‘oa‘oga e tatau ma le amio Atua,
4. ‘ua fa‘afefeteina o ia, ‘ua lē iloa se mea, a ‘ua se ma‘i lona su‘esu‘e ma lona fīnau i ‘upu e tupu mai ai le mata‘u‘a, ma le misa, ma ‘upu fa‘aleaga ma māsalosalo leaga,
5. o fīnauvalega o tagata loto leaga, o ē ‘ua tēte‘a ma le ‘upu moni, o ē ‘ua manatu o le amio Atua o le ala lea e maua ai le ‘oloa.
6. A o le amio Atua ma le loto mālie, o le ‘oloa tele lava lea.
7. Auā tatou te le‘i ‘aumai lava se mea e tasi i le lalolagi, ‘ua mautinoa fo‘i tatou te lē mafai ‘ona ‘ave ‘ese ai o se mea.
8. ‘Āfai ‘ua maua e i tatou o mea e ‘a‘ai ai ma mea e ‘o‘ofu ai, ‘ia gata ai o tatou mana‘o.
9. A o ē mana‘o i le fia mau‘oa, e maua i latou i le fa‘aosoosoga, ma le mailei, ma tu‘inanau e tele e valea ai ma leaga ai, o mea ia e goto ai tagata i le fanoga ma le malaia.
10. Auā o le mana‘o i tupe, o le pogai lea o mea leaga uma lava; ‘ua manana‘o tele i ai nisi, ‘ona sesē ai lava lea o i latou i le ‘upu o le fa‘atuatua, ‘ua tuia ai ‘ua ati i latou e i latou i puapuagā e tele.
11. A o oe, le tagata o le Atua e, ‘ia e sola ‘ese i ia mea; a ‘ia e tausisi atu i le amiotonu, ma le amio Atua, ma le fa‘atuatua, ma le alofa, ma le ‘onosa‘i, ma le agamalū.
12. ‘Ia e tau le tā‘ua lelei i la lē fa‘atuatua, tago atu ia i le ola fa‘avavau, na vala‘auina ai fo‘i oe, ma ‘ua e ta‘utino atu i le ta‘utinoga lelei i luma o molimau e to‘atele.
13. ‘Ou te fai atu lava ‘iā te oe i luma o le Atua, o lē fa‘aola i mea uma, i luma fo‘i o Keriso Iesu, o lē na molimau i le ta‘utinoga lelei ia Ponotio Pilato.
14. ‘Ia e tāofi lenei poloa‘iga ma le lē ponā, ma ‘ia lē mata‘uleagaina, se‘ia o‘o atu i le fa‘aali mai o lo tatou Ali‘i o Iesu Keriso.
15. E fa‘ailoa mai lea mea e ia i ona lava aso, o ia o le Ali‘i e manuia mōna ‘ua to‘atasi, o le Tupu o tupu, ma le Ali‘i o ali‘i.
16. O lo‘o na o ia o lē soifua pea lava, o lē afio i le malamalama e lē masao i ai se tasi; e le‘i va‘aia o ia e se tasi tagata, e lē mafai fo‘i ‘ona va‘ai i ai. ‘Ia ‘iā te ia le vi‘iga ma le mana e fa‘avavau. Amene.
17. ‘Ia e matuā fai atu i ē mau‘oa i lenei olaga, ‘aua ne‘i fa‘amaualuluga i latou, ‘aua fo‘i le fa‘amoemoe i le ‘oloa e fa‘alētumau, a o le Atua soifua, o lo‘o foa‘i tele mai ‘iā te i tatou mea uma lava e fa‘afiafia ai.
18. ‘Ia latou agalelei atu, ‘ia tamao‘āiga i galuega lelei, ‘ia mataalofa, ‘ia latou avatu fua a latou mea,
19. ma ‘ia fa‘apea ‘ona latou teua ‘oloa mo i latou lava, o le fa‘avae lelei mo aso atalī, ‘ina ‘ia latou fetāgofi atu i le ola moni lava.
20. Timoteo e, ‘ia e tausi i le mea na tu‘uina atu ‘iā te oe. ‘Ia ‘alo‘alo ‘ese i ‘upu leaga ma le lē aogā, ma finauga i mea ‘ua igoa pepelo ai o le iloa.
21. O isi o ē na tāofi ai, ‘ua sesē ai i latou i le fa‘atuatua.‘Ia ‘iā te oe le alofa tunoa. Amene. #