4. Men då dei såg opp, fekk dei sjå at steinen var rulla til sides. Han var svært stor.
5. Då dei kom inn i grava, såg dei ein ung mann som sat på høgre sida, kledd i ein lang, kvit kjortel. Dei vart gripne av otte og undring,
6. men han sa til dei: «Ver ikkje redde! De leitar etter Jesus frå Nasaret, den krossfeste. Han er stått opp, han er ikkje her. Sjå her er staden der dei la han!
7. Men gå av stad og sei til læresveinane hans og til Peter: ‘Han går føre dykk til Galilea. Der skal de få sjå han, slik han har sagt dykk.’»
8. Då gjekk dei ut att og rømde frå grava, skjelvande og frå seg av redsle. Og dei sa ikkje eit ord til nokon, for dei var redde.
9. {{Då Jesus hadde stått opp att, tidleg den første dagen i veka, synte han seg først for Maria Magdalena, som han hadde drive sju vonde ånder ut av.
10. Ho gjekk av stad og fortalde det til dei som hadde vore med han, og som no sørgde og gret.
11. Men då dei fekk høyra at han levde, og at ho hadde sett han, trudde dei det ikkje.
12. Sidan synte han seg i ein annan skapnad for to av dei medan dei var på veg ut på landet.
13. Dei òg kom og sa det til dei andre, men dei vart heller ikkje trudde.
14. Til sist synte han seg for dei elleve medan dei var til bords. Han refsa dei fordi dei var så vantru og hardhjarta, og fordi dei ikkje trudde på dei som hadde sett at han var stått opp.
15. Han sa til dei: «Gå ut i all verda og forkynn evangeliet for alt som Gud har skapt!
16. Den som trur og blir døypt, skal bli frelst. Men den som ikkje trur, skal bli fordømd.