1. ពេលអេប្រាអ៊ីមហាមាត់និយាយប្រជាជនញ័ររន្ធត់គ្រប់ៗគ្នាអេប្រាអ៊ីមជាមេដឹកនាំរបស់ស្រុកអ៊ីស្រាអែលប៉ុន្តែ គេមានទោស ព្រោះតែគោរពព្រះបាលហើយគេក៏បាត់បង់ជីវិត។
2. ឥឡូវនេះ ពួកគេនៅតែប្រព្រឹត្តអំពើបាបដោយយកប្រាក់មកសូនធ្វើរូបបដិមាតាមទេពកោសល្យរបស់ខ្លួន សម្រាប់ថ្វាយបង្គំ។រូបទាំងនោះសុទ្ធតែជាស្នាដៃរបស់ជាងប៉ុន្តែ ពួកគេនាំគ្នាពោលថា“យើងត្រូវធ្វើយញ្ញបូជាមនុស្សថ្វាយព្រះនេះ!”តើមនុស្សអាចថើបរូបគោដូច្នេះកើតឬ?
3. ហេតុនេះ ពួកគេនឹងប្រៀបដូចជាអ័ព្ទនៅពេលព្រលឹមដូចទឹកសន្សើមនៅពេលព្រឹកដែលបាត់ទៅវិញយ៉ាងឆាប់ៗដូចកម្ទេចចំបើងប៉ើងចេញពីលានបោកស្រូវនិងដូចផ្សែងហុយចេញពីរោងបាយ។
4. ចំណែកឯយើងវិញយើងជាព្រះអម្ចាស់ ជាព្រះរបស់អ្នកតាំងពីស្រុកអេស៊ីប អ្នកមិនស្គាល់ព្រះណាផ្សេងទៀតក្រៅពីយើងទេក្រៅពីយើង ក៏គ្មានព្រះសង្គ្រោះណាដែរ។
5. យើងបានថែទាំអ្នកនៅវាលរហោស្ថាននៅលើទឹកដីហួតហែង។
6. ពេលពួកគេមកដល់កន្លែងសម្បូណ៌សប្បាយពួកគេបរិភោគយ៉ាងឆ្អែតឆ្អន់។ពេលពួកគេបរិភោគយ៉ាងឆ្អែតឆ្អន់ពួកគេវាយឫកខ្ពស់ហេតុនេះហើយបានជាពួកគេបំភ្លេចយើង។
7. យើងនឹងប្រែក្លាយដូចជាសិង្ហនិងដូចខ្លារខិននៅតាមផ្លូវយើងឃ្លាំមើល ដើម្បីសង្គ្រប់លើពួកគេ។
8. យើងនឹងប្រហារពួកគេយ៉ាងសាហាវដូចខ្លាឃ្មុំញីបាត់កូន។យើងនឹងហែកទ្រូងពួកគេយើងហែកពួកគេស៊ី ដូចសិង្ហញីត្របាក់លេបហើយសត្វព្រៃនឹងមកហែកស៊ីសាកសពរបស់ពួកគេ។
9. អ៊ីស្រាអែលអើយ ដោយអ្នកប្រឆាំងនឹងយើងអ្នកនឹងត្រូវវិនាសពុំខាន!គ្មាននរណាអាចជួយអ្នកបានទេ!
10. តើស្ដេចរបស់អ្នកនៅឯណាម្ដេចក៏មិនឃើញមកជួយសង្គ្រោះអ្នកនៅតាមក្រុងទាំងប៉ុន្មាន?រីឯពួកចៅហ្វាយ ដែលអ្នកធ្លាប់ពោលទៅគេថា“សូមតែងតាំងស្ដេច និងមេដឹកនាំឲ្យគ្រប់គ្រងលើយើង”តើអ្នកទាំងនោះទៅណាអស់ហើយ។
11. យើងបានប្រគល់ស្ដេចឲ្យអ្នក ទាំងខឹងយើងដកស្ដេចនោះវិញ ទាំងក្រេវក្រោធ។