3. N'ọnu onye b͕agọrọ ab͕agọ n'uche-ya ka ome npako di:Ma eb͕ub͕ere-ọnu nke ndi mara ihe gēdebe ha.
4. Mb͕e ehi nādighi, ulo anāzù ehi nādi ọcha:Ma ihe-omume riri nne nēsite n'ike ehi.
5. Onye-àmà nke kwesiri ntukwasi-obi adighi-ekwu okwu-ugha:Ma onye-àmà okwu-ugha nēkupu okwu-ugha dika ume.
6. Onye nākwa emò achọwo amam-ihe, ma ọ hughi ya:Ma ihe-ọmuma diri onye-nghọta nfe.
7. Je na ncherita-iru onye-nzuzu,I gaghi-amata kwa eb͕ub͕ere-ọnu ihe-ọmuma n'aru ya.
8. Amam-ihe onye nwere ezi uche bu ighọta uzọ-ya:Ma uche b͕agọrọ ab͕agọ nke ndi-nzuzu bu aghughọ.
9. Ndi b͕agọrọ ab͕agọ n'uche-ha, ikpe-ọmuma nākwa emò ha:Ma n'etiti ndi ziri ezi ka ihe nātọ Chineke utọ di.
10. Obi mara ilu nke aka ya;Ọ bu kwa n'ọṅù-ya ka onye nke nābughi nke ya nādighi-agwakọta onwe-ya.
11. Ulo nke ndi nēmebi iwu, agēme ka ọ tọb͕orọ n'efu:Ma ulo-ikwū nke ndi ziri ezi gāma akwukwọ dika ihe akuku aku.
12. Uzọ di nke ziri ezi n'iru madu,Ma nsọtu-ya bu uzọ nile nke ọnwu.
13. Ọbuná n'ọchì ka ihe nēb͕u obi nb͕u;Ọzọ, ikpe-azu ọṅù bu iru-újú.
14. Site n'uzọ nile nke aka ya ka afọ gēju onye laghachiworo azu n'obi:Ma ọ bu site n'onwe-ya ka afọ gēju ezi madu.
15. Onye nēnweghi uche nēkwere okwu nile ọ bula:Ma onye nwere ezi uche nāghọta ije-ukwu-ya.
16. Onye mara ihe nātu egwu, we si n'ihe ọjọ wezuga onwe-ya:Ma onye-nzuzu nēwebiga iwe ókè, we nātukwasi obi.