25. Oime vaecue ore paûme siete tybyra cuera, ja pe iyŷpycue omenda vaecue cuña reje, ja omano voí ja ndaitayrai pypé ojeya jembirecope itybyrape.
26. Upeicha yeby pe mocoîjá, ja pe mbojapyjá ja pe sietejá peve yepe omenda jese,
27. ja omanombá rire jaecuera omanó avei ipajápe pe jembireco cueracué.
28. Upeicharamo, pe oicove yeby jaguâ árape ¿máva rembirecotapa jae umi siete apytegui, omenda vaecue guive jese opavavé jaecuera?
29. Ja Jesús oñeê ja jei ichupecuera: Peê peyabŷ catu nda peicuaai gui co Santa Escritura ja Tûpâ Ñandeyára puacacué.
30. Pe yaicove yeby jaguâ árape, umi cuimbae na jembirecóichene, ja umi cuña na iménaichene, umi Ñandeyára rembiyocuaichagua voí vaerâ yvagape.
31. Uperire yaévo pe yaicove yeby jaguâ ára umi omano vaecue paûgui reje, ¿na pemoñeêi chepane racaé pe cuatia oyee jague peême Tûpâ Ñandeyára yurú rupi voí:
32. Che jae Abraam Ñandeyára, ja Isaac Ñandeyára ja Jacob Ñandeyára. Jae voí ndajaei Ñandeyára umi omano vaecuepe, umi oicovevapente.
33. Ja ojendu pypé upea, umi oñembyatŷva jicuai upepe ojecharâmô co jemimboe reje.
34. Ja umi fariseo ojendú pypé Jae omokîrîrî jague umi saduceope oñembyatŷ Jendápe.
35. Ja peteî jaecuérava, caraí iñarandúva voí ojaâmbotávo Ichupe, oporandu:
36. Ore mboejára, ¿Mávapa pe Ñandeyára rembiapoucapŷ tuvichavéva pe Moises ñeêmeguaré?
37. Ja Jae jei ichupe: Rejayjú vaerâ Tûpâ Ñandeyárape nde pyaite guive, ja ne ânga apyté guive ja ne aranducuepáitepe.
38. Cóva catu pe Ñandeyára rembiapoucapŷ tuvichavéva ja tenondegua memé.
39. Ja pe mocoîja upea yoguajánte avei: Rejayjú vaerâ nde rapichape nde reyejayjú jaichante avei.