1. Upeicharamo peico peê Tûpâ Ñandeyára reco yoguajápe itaŷra cuera oyejaŷjúvaicha,
2. ja peico taŷjúpápe Cristo pende rayju jagueicha, ja oñemeê jagueicha Iyupe voi ñande rejejápe peteî oñecuameêmbyre oyejapŷ vaicha jyâcuâ pôrâiteva Tûpâ Ñandeyárape.
3. Pe itieŷ ja mbae kyá ja pe mbaepotavai, ani penemandua umi ñeêngue reje yepe pende apytepe, nda iyái járeje umi imarangatúvape.
4. Ani peñeê tieŷ, ani peñeê taby, ja ani peñeê ñomboyarújápe, mbae iya-ŷ-va umiva. Upea rangue peyerorojory oñondive.
5. Peicuaa vaerâ voí avave itieŷva, terâ tecové otîŷva, terâ jaesénteva, terâ taângá ombuetéva, ndojupityi jaguâ oñemombae jaguâ Cristo ja Tûpâ Ñandeyára mbae yvagapeguape.
6. Ani avave penembotaby ñeê guaujápeguape. Coambae reje voi ou Tûpâ Ñandeyára pochyja umi iñeêrenduŷva cuera rejegua reje.
7. Upeareje ani pemoîrû ichupecuera umimbaepe.
8. Yma peêcuera voi pytûnguypeguare, coanga peyejesapéma Ñandeyára rejeguama ramo. Peicona, upeicharamo, umi ojesapéva rejegua ramo:
9. pe ojesapéva gui voi oico opa mbae pôrâ ja mbae jecopegua ja ñeê añetegua.
10. Ja peiporanguereco oimeraêva mbae oguerojorŷva Ñandeyárape.
11. Anichene peyejea umi jembiapo vaí reíva pytûnguypegua ndive, upea rangue peyao ichupecuera.
12. Mbae tieŷ yepe ñandeve ñañeê ramo umi jembiapo vaí ñemijamegua.
13. Ja opambae oyepyjy vai vaerâ ja oyejecháucápá vaerâ pe ojesapéva rupi.
14. Pe ojechaucápáva opambae iyejegui voi pe ojesapevante. Upevareje oyee: Epaŷ, nde rekéva reina! Ja epuâ umi omano vaecue apytegui ja Cristo nderesapéne.
15. Pemaêna, upeicharamo, mbaeichapa peico pene mârâ-ŷ-jaguâicha, ani itabŷvaicha iñarandúvaichante.
16. Peê pene râcâteŷ pende ára reje iya yave peême, ipojyi voi járeje coa ára.
17. Upevareje ani pene âcâ tabyrai: peñejaânte peicuaa pôrâ pe Ñandeyára rembipota:
18. ani peu vino pecaú jaguâicha pe ñane sarambípájá voí: ta jendápá pendepyape pe Espiritu,
19. peñomonguetávo oñondive Tûpâme purajéi rupi, ja ñemboe purajéipe, ja ñeêngá ñane ânga rejeguápe, pepurajéivo ja pembopúvo Ñandeyárape pende pyapype,
20. perojorŷvo Tûpâ Ñandeyára ñande Rúpe tapia opambae reje Ñandeyára Jesu Cristo rérape.
21. Peyoyoco oyupe pe pekyjŷyéjápe Cristogui.
22. Peê cuña pemendava ta peyeyoco pene ménape cuera Ñandeyárape guaicha avei.
23. Pe iména pe cuña âcânte voi, Cristo pe Iglesia Jesecueraguava âcâ jaicha, ja Jae voi co jete omojesâijára.
24. Upeicharamo, pe Cristo rejegua Iglesia voi oyeyoco jaicha Cristope, upeicha avei umi cuña omendava toyeyoco iménape cuera opambaepe.
25. Peê cuimbae pemendáva pejaŷju pene rembirecope Cristo ojayju jagueicha pe Iglesia Jesecueraguavape, ja oñemeê jagueicha Iyupe voi Jesecuera rejejápe,
26. omomarangatúpá jaguâ ichupecuera ja omopôti jaguâ jemimboecue rupi ŷ caraipeicha,
27. ojechauca jaguâ oyeguajá iyupeguârâ pe Iglesia Jesecueraguavape ikŷa-ŷ-reje mamove ja ichaî-ŷ-reje, ja mbaeve vaí-ŷ-reje upeichaguava, imarangatuva ramonte ja ikya-ŷ-va ramonte.
28. Upeicha avei umi iména cuera tecôtevê ojayju jembirecope cuera oguetéichante avei. Upe ojayjuva jembirecope, iyupe avei oyejayju.
29. Avave no ñamotareyvái máramo oguete voi. Upea rangue omojyvâtâ, ja oñangareco pôrâ jese, Cristo oñangarecojaicha avei Iglesia Jesegua cuérava reje avei.
30. Ñande voi jete pejengue nungá.
31. Upeareje pe cuimbae ojeya vaerâ itúvape ja isŷpe, ja oñemboyá vaerâ jembireco reje, ja oico vaerâ co mocoîve oñondive peteî teté ramo.
32. Tuvichaite co mbae ñemingue ñongatupyré cova co Cristo ja Iglesia Jeseguacuerava rupigua.
33. Peteî teî pende cuérava avei pende yejegui voi pejayju pene rembirecope pende yupe guaicha, ja pe cuña tombuete iménape.