1. Upeicharamo, che aimeva añeñapytîjápe Ñandeyára rejejápe, ayerure peême tapeico peê iya jaicha pe peyeyocuai jápe peê peñe jenôi jaguepe,
2. ja tapeico peñemomîrî jápe, ja ta pende pochycuaa-ŷ-jápe, ja pero puacájápe, ja perokîrîrî oñondive taŷjújápe.
3. Peñejaâ pende pya apyte guive peyerereco jaguâ peteîchante peê Espiritu rejegua voi oyopype, peimeme oñondive peyuaby-ŷ-reje.
4. Oime peteî teté año, ja peteî Espiritu añó, oime jaicha pe peteî mbae jaârômbyrâ pejupity vaerâ vaecue pe peñejenôi jague avei.
5. Peteî Ñandeyára año oime,
6. peteî yeroviajá, peteî caraíjá, oime peteî Tûpâ Ñandeyára año, Jae opavave Rú. Jae opambae ári, Jae oñatôi opambae rupi, ja oico opambae pype.
7. Peteî teîme ñandeve oñemeê Ñandeyára pya pôrâ gui ñane pytyvôjarâ, iyájaicha ñandeve pe Cristo omeê rei mbyre guivo.
8. Upevareje oyee voi Jae oyupi jague yvape, ja ogueroyupi iñapytîjápe ñapytîmbyre atŷra, ja omeê imeêmbyre cuimbae cuerape.
9. ¿Ja mbaépa co jeise co ñeê Jae oyupi? Ogueyŷ raê nerae avei umi yby ipypucuvéjápe.
10. Upe ogueyŷ vaecue, upéva vointe upe oyupi yeby vaecue avei yvatevé opa umi yvagapegua gui omuenyjêmba jaguâ opambae iyejegui.
11. Oime voi vaecue peteîva Jae voi omoingo vaecue jembiyocuai Apostolrâ, ja ambuecue mojerâcuâjárarâ, ja ambuecue ñemoñeêjárarâ, ja ambue ânga rerecuárâ, ja poromboejárarâ.
12. Coâvape voi omoingo vaecue ombosacói pôrâ jaguâ umi imarangatúvape, oyeyocuaiuca jaguâ jecópe jembiapoucapŷpe ipytyvôjárarâ, ja omopuâ jâtâ jaguâ Cristo reté rejeguape,
13. yajupity peve opavave ñande pya peteîchante yayeroviajápe ja yaicuaajápe Ñandeyára Raŷpe yajupitŷvo yaico peve cuimbae cacuaájápeicha, ja Cristo rejegua jaeteva reco jápeicha.
14. Upeicharamo nda yaicovei chene mitâicha terâ umi oico rei reivaicha, ja oyererajávaicha oimejá coty ybytú rupícha oimeraêva oporo mboéva rupi, ja umi carai ñujâ rupi oyapóva pichyguy oporombotabŷjápe ñane mombia jaguâichagua.
15. Coanga voi ñande yaicóne jecópe taŷjúpápe, ja yacacuaane opambaepe Jeseguarâ Jae voi ñane âcâva Cristo.
16. Upévagui voi pe jetépá oñemyatyrômba, ja oyuayú pôrâ oñondive, ja opa oyuapŷjá oñopytyvôva pe oyupe, ja pe imbaraete cue icatu jaicha iya peteî teî ñande rayŷguepe ocacuaa jaguâ jecópe ñande reté, upeicha avei iya jetepe oñemopuâ jaguâ pe teco porayjupe.
17. Upeicharamo che jae peême, ja aicuaauca Tûpâ Ñandeyára rérape anichene jaguâ peicove umi ambue pytaguáicha oico rei reiva iñâcâtabyrai vaicha:
18. umiva oico pytûnguype voí iñarandu rejeve yepe, oñemo mombyry vaecue Tûpâ Ñandeyára recove gui itabŷ gui voi jaecuera ja ipya jâtâ gui.
19. Jaecuera oñembo pyajâtâ rire oñemeê otîŷme oyapo jaguâ ipya yerurete gui opaichagua tieŷ tuvicha vichavéva.
20. Nda upeichai racae peê peñemboe rae Cristo reco reje,
21. pejenduma guive iñeê, ja peñemboéma guive Jesegua ramo pe añetegua reje iya jaichagua umi Jesus rejeguape,
22. pejeya jaguâ pende recocue ymaguare, ja pe pende reco tuya ybypóra rei rejegua, iñembuaipyrâ ipyapypegua mombiajára gui,
23. ja peñembo pyaju jaguâ co pe pende pyapype pene atôi járape,
24. ja peñemonde jaguâ pendeyupe voi pe teco marangatu pyajupe, pe Tûpâ Ñandeyára remi moñemoña voi, pe teco ipôrâva ja marangatuva jecopegua Ñandeyára Ñeê rejeguava.
25. Upeareje pepoípá opaichagua yapú gui, ja peñeê añetegua peteî teîva pende rapicha ndive, ñande voi oñopejengue oyuejegui guare voi.
26. Sapya peñembo pochy ramo, ani peñemo angaipa. Ani oiké cuarajy pende pochy aré yaveve.
27. Ani remoî jendaguâ mbaepochype.
28. Upe omonda vaecue, anive omonda, upea rangue, tombaapo toyejeca iporupi ipôrâ vaerâme, oguereco jaguâ omeê vaerâ pe ojasa asyva tecôtêvêguipe.
29. Mbaeve ñeê tieŷ ani osê pende yuru gui, ta peñeênte pe ipôrâ vaerâ tecôtevêjápe, pembo jecopôrâ jaguâ, ja pembojory jaguâ umi jendujarépe.
30. Ja ani pembopyambyasy Tûpâ Ñandeyára Espiritu Santo pe ñane jaângámoî jague upe ñande yayejepypá jaguâ ára ramo guârâ.
31. Opa pŷáró, ja pochŷ, ja ñemyrô, ja yuao, ja ñeêvaí, toñemboípákena pendejegui, ja opa pŷávaí.
32. Upea rangue pende pŷápôrânte oñondive, peiporo poriajuvereco ja peñyrô oyupe avei Tûpâ Ñandeyára avei oñyrô jagueicha peême Cristo rupi.