1. Upeicharamo, repuâ rire avei Cristo ndive, pejecá umi mbae jeco yvapegua rejeguáva, Cristo oijápegua pe iguapŷjápe mburuvicha guasu ramo Tûpâ Ñandeyára acatuape.
2. Pene manduá meme umi mbae yvapegua rejegua reje, ja anichene umi mbae ybyarigua reje.
3. Peê pemanovaicha voí, ja pende recovéeté oñemí jina Cristo ndive Tûpâ Ñandeyára pype.
4. Ja Cristo oyejecha yeby ramo -- Jae voi ñande recove ete -- uperamo peê peyecuaane avei Jendive iyeguaitejápe.
5. Upeareje pemomano pe pende reco ivaí vaerâ ybypóra rejeguavaicha teco tieŷ, pe teco kya, ja pe teco jacu, ja pe pya yerure vaíva, ja pendeséntejá, cova voi mbae raângá mbuetéjá váicha.
6. Umimbae rupi voi oñembo pochy vaerâ Tûpâ Ñandeyára, ja upeicha voi avei peêcuera yma pende reco vaí vaecue,
7. peico ramo guare umi angaipápe.
8. Coanga catu tecôtevê peyepea opaichagua angaipa gui, pe pochŷ gui, ja pe ñecoóî tabŷ gui, ja pe aguará reco gui, ja pe poromomârâ reí gui, ja pe yuru tieŷ reígui, anive jaguâ oñejendu umichagua mbae pende yuru rupi.
9. Ani peñombotaby oñondive yapujápe. Peêcuera voi peñemboíma vaecue pe ybypóra reco ymaguare pembaapo vaí jague gui,
10. ja upeicha avei peñemondéma vaecue pe teco ipyajúvape, oñembopyajúva jina pe mbaecuaa jecopegua ramo oyeyapo jaguâ pe omoñemoñajaré recoicha.
11. Co oñemoña ñypyru pyajúvape ndipori iñambuéva Griego ja Judio paûme, terâ caraíva rejegua ja icaraiŷva rejegua paûme, terâ pytagua ja Scutiaŷgua paûme, terâ tembiguai ja cuimbae jaéaénteva paûme, Cristo aénte voi opavave ramo, ja Jae opavave ñande pype.
12. Tecôtevê, upeicharamo, peñe mondénte peê, Tûpâ Ñandeyára pende poravó vaecue peê pene marangatuva voi, ja peyejaŷjúva, peñemondente pe teco pôrâ poriajuverecope, ja pe teco pya pôrâme, ja pe teco pendesénteŷjápe, ja pe teco pochycuaaŷme, ja pe teco rokîrîrîme,
13. ja perokîrîrî oyupe, ja peñoñyrô oyupe torypápe oime rire oñomoñemyrôva oyoupe. Pe Ñandeyára avei oñyrô jagueicha peême, upeicha peê avei peñoñyrô oñondive.
14. Ja opa âmbae ári pemonde poraŷju, upéva pe omboyuayúva jecoitepe.
15. Ja pe Cristo ñane mbopyaguapyjára tomokîrîrî pende pyapy: covaerâ voínte peñejenôi vaecue avei pe jete peteî rejeguajaré voínte; ja ta perojory Ichupe.
16. Pe Cristo ñeêngue topyta pene râcâteŷ vaicha pende pyape; opa arandu rejeve peñomboe, ja peñomomarandu oyoupe pene ñemboe purajei rejeve, ja peropurajéi pembuetejápe, ja peropurajei mbae yvapeguape, ja pepurajei pende pyapôrâ rejeve Tûpâ Ñandeyára ndive.
17. Ja opambae peyapóva pene ñeême terâ pene rembiapope, peyapópá Ñandeyára Jesu rérape, ja Jaerupi avei perojory Tûpâ Ñandeyára pe Túvape.
18. Ja peê, cuña pemendáva, peyeyoco pene ménape, iya jaicha umi Ñandeyára rejeguape.
19. Ja peê, cuimbae pemendáva, pejaŷjú pene rembirecope, ja ani pende pyáró peicovo ichupecuera.
20. Che raŷcuera, pene ñeêrendú pende rúpe opambaepe; cova voi ipôrâva umi Ñandeyára rejeguape.
21. Ja peê, túva cuera, anichene pembopochŷ reí pende raŷcuerape, anichene jaguâ ipyámîrî osêvo.
22. Peê, tembiguai, pene ñeêrendú opambaepe pende carai co ybyariguape, nda peyapoi pype tembiapo tesárupiguape, umi ombojoryvaicha sapyaite iyárape: pembaapo catu pende pya peteînte guive pekyjŷyejá reje Ñandeyáragui.
23. Ja oimeraêva mbae peyapójaichagua, pembaapo pendepya apytete guive Ñandeyárape guârâicha, ja na cuimbae peguârâichai.
24. Peê peicuaa voi pejupity vaerâjá Ñandeyáragui pe oñembo jecovia vaerâ peême pene rembiapocue repŷrâ. Peê voi peyeyocuaiucá Ñandeyára Cristope.
25. Pe jembiapo vaívape oñembojecoviane pe jembiapocue vaí, ja Tûpâ Ñandeyára ndo poroporavói ñande apé pôrâ gui.