1. Che Pablo, Cristo Jesu rembiyocuai, Apostol Tûpâ Ñandeyára rembipota rupi guare, ja ñande reŷi Timoteo,
2. romo maitéiucá umi imarangatúvape, ja ñande reŷicuerape yeroviajá Cristo rejeguáva Colossepe jicuáivape. Tûpâ Ñandeyára, ñande Rú ta pene mbopyapôrâ, ja ta penembopyaguapy peême.
3. Ore roguerojory Tûpâ Ñandeyárape, Ñandeyára Jesu Cristo Rúpe, roñemboévo tapia pendereje,
4. rojendujague reje peyeroviajá Cristo Jesu reje, ja peêcuera pejayjújá opa imarangatúvape,
5. pe pejaârôva rejejápe iñongatupyré peême guârâ yvape pe pejendu jague yma voi pe Ñeê añetegua Evangeliogui.
6. Cova voi ojupityma vaecue peême, oñemuasâi jaicha oparupi co yby yere reje avei oñembojeta jetavéva, ja ocacuaáva ojovo oparupi pene paûme guaicha avei, pe pejendú ja peicuaa jague ára guive co Tûpâ Ñandeyára pya pôrângue añetejápe.
7. Upeicha voi peicuaane rae avei Epafras ñaneîrû yajaŷjúva gui Cristo rembiyocuai yeroviajá peême ore recovia.
8. Jae voi omombeu avei oreve pende poraŷjú pe Espiritu recopegua gui.
9. Upévareje avei ore pe rojendu jague ára guive, ndo ropytuui roñemboévo pendereje, ja royerurévo peicuaapá jaguâ jecoitépe Ñandeyára rembipota, ja pene arandu pôrâ jaguâ, ja pejechacuaapá jaguâ mbae yvapegua,
10. peico jaguâ jecope iya jaicha Ñandeyára rejeguape, pembojory jaguâ jecopete Ichupe opa tembiapó pôrâme, peñe mombae pôrâ, ja pecacuaa jaguâ peicuaa pôrâ meve jecope Tûpâ Ñandeyárape.
11. Ja pe ipuacacue tuvichaite guive ta peñembopuaca opaichagua mbaraete rejeve peropuaca jaguâ meme peê cuera, ja perokîrîrî jaguâ torypápe.
12. Pembuete pe Túvape ñane mombae guasúva, iya jaguâ ñandeve yajupity jaguâ pe iñongatupyré umi imarangatuva peguârâ pe oyejesapé yvagapegua gui.
13. Jae voi ñanemboí pe pytûnguy puaca gui, ja ñande rerová pe Taŷra ojaŷjúetéva reco marangatujápe.
14. Jae pype voi yareco ñanderepŷrâ oyepeápá jaguâ ñane angaipa.
15. Upéva voi Tûpâ Ñandeyára yajechaŷva yoguajá pe iñypyrumbŷ ñemoñare oñemoña mboyve avave.
16. Jaerupi voi oñemoña opa yvape oiva, ja opa ybyari oiva, mbae yajechava ja mbae yajechaŷva, mburuvicha guasu renda yepe, ja carai guasu renda yepe, ja umi mburuvicha yepe, ja umi ipuacaitéva yepe, opava oñemoña Jaerupi ja Ichupe guârâ.
17. Jae oico oyejegui voi, ja Jae opambae mboŷvéguare, ja Jaerupi opambae opyta jecorâme.
18. Jae iñâcâ jetépe voi, pe Iglesia Jeseguávape. Jae voi pe iñypyrumbŷ, ja Jae pe oicove ypy yeby vaecue umi omano vaecue apytegui, itenondeve jaguâ Jae meme opambaegui.
19. Jiâ pôrâ Túvape voi opambae pôrâ oimba jaguâ Ipype.
20. Ja jiâ pôrâ Ichupe omoñyrômba opambae Iyupe voi Jae rupi, omokîrîrî pype juguy pe curusu rejeguare reje, Jae rupi omoñyrô jaguâ Iyupe opambae umi ybyari gua ja upeicha avei mbae yvapegua.
21. Peê avei yma pende pya resaité vaecue, ja pende pyáró vaecue pene rembiapo vaí rupi, coanga Jae pene moñyrôma peême,
22. oñembojeté jague rupi cuimbae ramo, ja omano jague rupi penemoingo jaguâ peême pene marangatujápe, ja pene mârâŷjápe, ja pende recopôtí jápe iyŷpype.
23. Upeicha vaerâ voi, peê pepyta jâtâ guive pende rapo jâtâ pôrâ reje, pende yeroviajápe, pende rerová ŷ reje pe pejaârôjá gui pe Evangelio rupi, pe pejendu vaecue, pe oñemo jerâcuâ vaecue opa ybypóra cuera jicuaivape araguype. Upevarâ voi che añemoingo vaecue jerecua ramo.
24. Coanga catu che rory ajasa asyjá reje pende rejejápe, ja che che rete rejeve aime Cristo recovia Jae ojasa asy ranguepe pe jete Iglesia Jesegua cuérava rejejápe.
25. Jeseguacuera rerecuá ramo ayeyapo che, Tûpâ Ñandeyára omoî jagueicha che pope che yocuaivo pende rejejápe, peñemboe jaguâ jecoitepe pe Tûpâ Ñandeyára Ñeê reje,
26. aicuaauca jaguâ pe mbae ñemingue, iñongatupyre ñemijáme, iñypyrumby mboyve, ja oime mboyve oñemoñava, ja coangama icuaaucápyré imarangatúva cuerape.
27. Umivape voi jiâ Tûpâ Ñandeyárape oicuaáucá co mbae tuvichaité, ja ipôrâite imombeu pyrârâ, co ñeê ñemingue iñongatupyré umi ybypóra umi pytaguava peguârâ, co ñeê: Cristo oi pende pype pejaârôjá pejupity jaguâ yvagape.
28. Upévape voi ore romojerâcuâ romomarandúvo opavave ybypórape, ja romboévo opavave ybypórape opa arandu rejeve, romoingo jaguâ opavave cu ybypórape jecoitepe Cristo rejegua ramo.
29. Covaerâ voi che ambaapo avei ja ayepyapy añejaâvo Upe che pytyvôjára ja che pya atôijára puacacue tuvichaite rupi.