1. Cova rire ajendu guau jyapú jetaite ybypóra vaicha yvape jeiva jicuai: Aleluya! Toñemombeú guasu Tûpâ Ñandeyára, ñane mârâ ŷ já Tûpâ Ñandeyára guioguante, iya voi Ichupe tuvichaite ja ipuacaitéetéve jaguâ.
2. Añetegua ja jecopetegua omojendajá Jae omojenda vaecue pe cuña jeco vaíetévape pe ombojeco vaípá vaecue jina opa ybypórape itieŷme, ja Jae oyepy vaecue jese jembiguai cuera ruguy reje oñejê vaecue pe cuña reco vai po rupi.
3. Ja mocoîjá jei yeby: Aleluya! toñemombeu guasu Ñandeyárape, pe tatatî ichuguiguare oyupi tapia ja tapiaguârâ.
4. Upei catu umi veinti cuatro ituyáva, ja umi irundy oicovéva oñesû ja ombuete Tûpâ Ñandeyárape pe oguapyva jina iguapyjá ári jeivo: Amen! Upeichana! Aleluya!
5. Toñemombeu guasu Tûpâ Ñandeyárape. Ja oime avei petei oñeêva ajendúva pe iguapŷjá renda guivo jeiva: Pemombeu guasu Tûpâ Ñandeyárape opa peê jembiguai cuérava peê pekyjŷyéva Ichugui mîchî ja tuvicháva.
6. Uperamo ajendu jeta ybypóra cuera ñeê vaicha ja jetaite ŷ ryapúicha ja ára sunu jâtâite ocapúvaicha jeíva: Aleluya toñemombeu guasu Tûpâ Ñandeyárape. Upéva voi Ñane Tûpâ Ñandeyára ipuacáva opambae rejeve oñemoingóma mburuvicha guasúeté ramo.
7. Ñande rorŷna ja yapurajéi ja ñambotuvicha Ichupe, oguajêmajá reje jiara omenda jaguâ pe Ovecha Raŷ, ja jembirecorâ oñembosacoíma,
8. ja oñemeê ichupe oñemonde jaguâ ao ipôrâite ja morôtívape overáitéva ja oyopará-ŷ-va, pe ao pôrâ morôtívaicha voi umi imarangatuva recocue.
9. Ja Jae jei cheve: Emoî cuatiápe: Jeco oryete vaerâ umi oñejenôi vaecue pe caruguasu pe Ovecha Raŷ mendaja peguârâpe. Ja jei avei cheve: Cova añetetegua Tûpâ Ñandeyára Ñeê.
10. Upei catu che añesû ipy renondepe ambuete jaguâ ichupe, ja jae jei cheve: Anikena! Che tembiguainte neîrû voi nde reŷicuera rejegua umi omojerâcuâjaré rejegua Jesúspe. Pembueténte Tûpâ Ñandeyárape: umi oporomojerâcuâjára Jesúspe umi oñemoñeêjára jeco rejeguante.
11. Uperamo ajecha peteî okê oyepea ramo yvape ja oyecuaa peteî cabayu morôtí ja pe jiarigua jéra Yeroviajá ja Jaetéva, upéva pe jecoitépe voi oporomojendáva ja jeco rupiete oñorayróva.
12. Ja jesa tata rendŷicha ja iñâcâ reje jeta umi mburuvicha guasu âcâ rejegua, ja oguereco peteî téra oyeje avave oicuaa ŷ vaecue jae añoite mante.
13. Ja pe iyao oñemonde jague oñemoingue rae tuguype ja jéra Tûpâ Ñandeyára Ñeê.
14. Ja umi jembiyocuai atyra yvapegua ou japycueri cabayu morôtí ári meme oñemondéva ao ipôrâiteva morôtíva oyopará-ŷ-vape,
15. ja iyuru gui osê peteî kyse pucu jaimbéva oikytî jaguâ umi tetaŷguape ja jae jerecua cuerane oyopy jâtâitévo ja jae opyrûjára pe parala ryrú pe Tûpâ Ñandeyára ipuacaitéetévéva pochŷ vaíetéjá ryru voíva,
16. ja iyao reje ja jetyma reje oguereco avei co téra: Mburuvicha guasu Ruvichá guasueté ja carai guasu Carai guasúeté.
17. Ja ajecha guaú peteî yvapeguape oñemboŷ ramo jina cuarajŷpe osapucai jâtâitéva jeivo opa guyra ovevéva yva rupi pe: Peyu peñembyatŷ co Tûpâ Ñandeyára caruguasújápe,
18. peu jaguâ mburuvicha guasu roo, ja mburuvichamimi roo, ja umi ipuacáva roo, ja cabayu roo, ja umi jiaricuera oiva roo avei, ja opaichagua ybypóra roo avei, ja umi jaeaéva roo, ja umi tembiguai yoguapyre roo upeicha avei, umi mîchîva roo, ja umi tuvichava roo avei.
19. Uperire ajecha guau pe maymba vaípe ja umi mburuvicha guasu co ybyariguape, ja jembiyocuai atyrape oñembyatypáite oñorayrô jaguâ ipajaitépe pe cabayu ári oiva ndive, ja jembiyocuai atyra ndive.
20. Ja oyeyopyjy pe maymba ja jendive pe oñemoñeêva guaujápe avei, upe oyapo vaecue jechapyrâ jenondepe omombia jague umi oguereco vaecue isyvápe oyejechacuaaucá jaguâ pe maymba rejeguajá, ja ombuete vaecuepe jaângápe. Â mocoive oyeity jecove rejeve pe tata guasu rendape jendŷva itáycú rejeve.
21. Ja umi ambuecue omanómba pe cabayu ári oiva kyse pucu rupi pe kyse pucu osêva iyuru gui ja opa guyra jyvâtâmba joocueracue gui.