1. Ja ajecha guaú pe Ovecha Raŷ oipea ramo peteî umi siete iñapytîjáva, ja ajendu guau peteî umi irundy oicovévagui jei ramo oñeêva ára sunúicha: Peyó!
2. Ja amaê ja ou sapyaite peteî cabayu morôtíva, ja pe oi vaecue jina jiari oguereco ybyrapá juŷ mondojá, ja oñemoî iñâcâreje mbae iñopêmbyre, ja Jae osê ojóvo oñembopuaca oicovo opava reje ipuacaiteve jaguâ opavave reje.
3. Ja Jae oipea ramo pe iñapytîjá mocoîjá ajendu guaú pe mocoîjá oicovévape jei ramo: Peyo!
4. Ja upevove osê peteî cabayu pytâva, ja oime oi vaecue jina jiari, ja oñemeê ipuaca jaguâ omomba jaguâ umi ybypóra cuera reco ipochycuaa-ŷ-já, ja oyoyucauca jaguâ oyoupe cuera, ja oñemeê ichupe peteî kyse pucu pucuetévéva.
5. Ja oipea ramo pe mbojapŷjá iñapytîjá, ajendu guaú pe mbojapŷjá oicovéva jei ramo Peyo! Ja che amaê guau, ja upevove osê peteî cabayú jûva, ja pe oi vaecue jina jiari oguereco ipope peteî pesú.
6. Ja ajendú oñeê vaicha umi irundy oicovéva apytepe jeíva: Peteî kilo typyratŷ reje oñemeêne diez mbaerepy, ja mbojapy kilo avatícurécué reje oñemeêne avei diez mbaerepŷ, ja anichene reyabyky pe ñandŷ terâ pe vino icaraíva.
7. Ja Jae oipea ramo pe irundy oñeñapytî ja ajendu guaú pe irundŷjá oicovévape oñeê ramo ja jei: Peyo!
8. Ja amaê guaú, ja sapya ou peteî cabayu saŷyú, ja pe oi vaecue jina jiari jérava Ñemanó, ja umi omano vaecue atyra ou japycueri, ja oñemeêne ichupecuera ipópe irundŷjápe co ybyari oyuca jaguâ ybypora cuerape kyse pucúpe ja ñembyajŷi gui ja mbaasy gui ja umi mymba iñaróva co yby arigua rupi.
9. Ja oipea ramo pe cincojá iñapytîjá, ajecha guaú pe oñemboejá renda guype umi omano vaecue ânga umi oyeyuca vaecue rejegua Tûpâ Ñandeyára Ñeê rejejápe ja umi ñeê jaecuera oicuaauca vaecue rejejápe.
10. Ja jaecuera oyerure osapucaijápe jeivo: ¿Aracaé pevépa Nde aréta, ore Ruvicha Guasu Ne marangatu jaetéva, rejo jaguâ remojenda jaguâ ja reyepy jaguâ umi oicova yby ári reje ore ruguy reje?
11. Ja oñemeê peteî teî ichupe cuéravape ao pucu morôtîva, ja oyee ichupecuera opytuu jaguâ kîrîrîjáme sapyamivénte oimba meve iñîrûnguecuera ja jeŷicuera oyeyuca vaerâ gueteri, oyeyuca jagueicha jaecuera voi.
12. Ja ajecha guau oipea ramo pe seisja iñapytîjá, ja oico peteî yby ryryi guasu ja pe cuarajy oñemojû ao jûvaicha ja pe yasy oyeju pŷtâmbaite tuguŷcha.
13. Ja umi ára resa joa ybype peteî higo râcâ gui ocui jaicha jia kyva oyetybyró ramo guaicha ybytu jâtâ rupi.
14. Ja pe ára yepeve ojasa oñembuaipa ichaimbá vaicha peteî cuatia iyapacuapyréicha ja umi itá atyra ja umi yby atyra pe ŷ mbytepegua oyererovápá jendágui.
15. Ja umi mburuvicha guasuete ybyarigua ja umi carai guasuete ja umi mburuvichami ja umi mbaererecojá ja umi ipuacáva opavave tembiguai ja jaeaeva yepeve oñemí yoa itacuápe ja umi itá atyra paûme,
16. ja jei umi itá atyrape ja umi itápe: Peánte ore ári, ore moâmba jaguâ amo oguapŷva jina mburuvicha guasu guapyjá ári resá gui ja pe Ovecha Raŷ pochŷ gui,
17. oumaja reje pe ára guasu Jae ipochy jaguâ ára. ¿Ja avápa oimene ogueropuaca vaerâ?