22. Nuair a chuala siad é, rinne siad iontas; agus d'fhág siad é agus d'imigh leo.
23. An lá céanna tháinig Sadúcéigh chuige, dream a deir nach bhfuil aon aiséirí ann; agus chuir siad ceist air,
24. agus dúirt siad leis, “A Oide, dúirt Maois, ‘Má fhaigheann fear bás gan clann a bheith aige, caithfidh a dheartháir an bhaintreach a phósadh, agus clann a sholáthar dá dheartháir.’
25. Anois bhí seachtar deartháir inár measc; agus phós an chéad deartháir agus fuair sé bás, agus ó nach raibh aon chlann aige d'fhág sé a bhanchéile dá dheartháir.
26. Mar an gcéanna don dara agus don tríú duine, agus anuas go dtí an seachtú duine.
27. Agus ina dhiaidh sin uile, fuair an bhean bás.
28. In am an aiséirithe mar sin, cé acu den seachtar a mbeidh sí mar bhanchéile aige? Mar bhí sí acu uile go léir.”
29. Ach d'fhreagair Íosa iad, “Tá dul amú oraibh, ó nach eol daoibh an scrioptúr ná cumhachtaí Dé.
30. Mar san aiséirí ní bhíonn pósadh ná cleamhnas ann, ach bíonn siad mar aingil i bhflaitheas Dé.
31. Agus i dtaca le haiséirí na marbh, nár léigh sibh an ní a dúirt Dia libh,
32. ‘Is mise Dia Abrachaim, agus Dia Íosóig, agus Dia Iácóib.’? Ní Dia na marbh é ach Dia na mbeo.”
33. Agus nuair a chuala an slua é, bhí iontas orthu faoina theagasc.
34. Ach nuair a chuala na Fairiséigh gur chuir sé na Sadúcéigh ina dtost, tháinig siadsan le chéile.
35. Agus d'fhiafraigh duine acu, a bhí ina dhlíodóir, ceist de, le féachaint a chur air.
36. “A Oide, cad í an aithne is mó sa dlí?”
37. Agus dúirt sé leis, “Gráigh do Thiarna Dia le do chroí uile agus le d'anam uile, agus le d'intinn uile.
38. Is í sin an aithne mhór agus an phríomhaithne.
39. Agus tá an dara haithne ar aon dul léi, Gráigh do chomharsa mar tú féin.
40. Is ar an dá aithne seo atá an dlí uile agus na fáithe bunaithe.”