42. Y mae hanes Joacim a'i ymarweddiad amhur ac annuwiol wedi ei ysgrifennu yn llyfr croniclau'r brenhinoedd.
43. Daeth ei fab Jehoiachin yn frenin yn ei le. Pan ddaeth i'r orsedd yr oedd yn ddeunaw oed.
44. Bu'n frenin am dri mis a deg diwrnod yn Jerwsalem, a gwnaeth ddrwg yng ngolwg yr Arglwydd.
45. Ymhen blwyddyn anfonodd Nebuchadnesar i'w ddwyn i Fabilon ynghyd â llestri sanctaidd yr Arglwydd.
46. Cyhoeddodd Sedeceia yn frenin ar Jwda a Jerwsalem.Un ar hugain oed oedd Sedeceia ar y pryd, a theyrnasodd am un mlynedd ar ddeg.
47. Gwnaeth ddrwg yng ngolwg yr Arglwydd, heb ystyried y geiriau a lefarwyd gan yr Arglwydd drwy enau'r proffwyd Jeremeia.
48. Wedi iddo dyngu llw o deyrngarwch i'r Brenin Nebuchadnesar yn enw'r Arglwydd, torrodd Sedeceia y llw a gwrthryfelodd. Aeth yn wargaled ac ystyfnig a throseddodd ddeddfau Arglwydd Dduw Israel.
49. Cyflawnodd arweinwyr y bobl a'r prif offeiriaid lawer o bethau annuwiol, a thorri'r gyfraith, gan ymddwyn yn waeth na'r cenhedloedd i gyd ym mhob math o amhurdeb, a halogi teml yr Arglwydd, a oedd wedi ei chysegru yn Jerwsalem.
50. Anfonodd Duw eu hynafiaid drwy ei negesydd i'w galw'n ôl, am fod ei fryd ar eu harbed hwy a'i dabernacl.
51. Ond gwatwarasant ei negeswyr, ac ar y dydd y llefarodd yr Arglwydd yr oeddent yn gwawdio ei broffwydi,
52. nes iddo ddigio wrth ei genedl oherwydd eu gweithredoedd annuwiol, a threfnu i frenhinoedd y Caldeaid ymosod arnynt.