1-3. Ako, si Ezequiel nga pari ug anak ni Busi, usa sa mga Judio nga nabihag sa Babilonia ug nagpuyo sa daplin sa Suba sa Kebar. Sa ikalimang adlaw sa ikaupat nga bulan sa ika-30 nga tuig nakita ko nga nabukas ang langit ug nakakita akog panan-awon gikan sa Dios. (Ikalimang tuig kadto sa pagkabihag ni Hari Joaquin). Ang Ginoo mihatag kanakog mensahe didto sa yuta sa Babilonia daplin sa Suba sa Kebar ug gigamhan ako sa Ginoo.
4. Nakita ko ang usa ka unos gikan sa amihanan. Ug gikan sa bagang panganod nagpangidlap ang kilat ug misanag ang langit. Diha sa dapit nga nagpangidlap ang kilat, nakita ko ang daw naggilakgilak nga bronsi.
5. Unya gikan sa taliwala sa unos, migula ang daw upat ka buhing binuhat. Sama silag hitsura sa tawo
6. apan ang matag usa kanila may upat ka nawong ug upat ka pako.
7. Tul-id ang ilang bitiis ug ang ilang tiil sama sa tiil sa baka ug naggilakgilak sila sama sa gipasinaw nga bronsi.
8. Ilalom sa matag pako may kamot nga iya sa tawo.
9. Nag-abot ang tumoy sa ilang mga pako ug sila molupad bisan asa padulong nga dili na kinahanglang moliso.
10. May upat ka nagkalainlaing nawong ang matag binuhat: sa atubangan nawong sa tawo, sa tuo nawong sa liyon, sa wala nawong sa torong baka ug sa luyo nawong sa agila.
11. Mao kini ang ilang mga nawong. Ang duha ka pako sa matag binuhat binukhad busa nag-abot ang matag tumoy niini samtang ang duha ka pako sa matag binuhat maoy nagtabon sa ilang lawas.
12. Bisan asa sila padulong dili na sila kinahanglang moliso pa.
13. Sa taliwala sa mga binuhat dihay morag nagsiga nga daw sulo nga nagtaboktabok. Gikan sa maong kalayo nagpangidlap ang kilat.
14. Ang mga binuhat nagngadto-nganhi sama ka paspas sa kilat.