1. Sa pagkasayod ni Mardoqueo niining tanan, gigisi niya ang iyang bisti ug nagsul-ob siyag sako aron pagpaila sa iyang kaguol. Gibutangan niyag abo ang iyang ulo unya miadto siya sa taliwala sa siyudad ug mitiyabaw sa tumang kaguol.
2. Misaka siya ngadto sa ganghaan sa palasyo sa hari bisag wala itugot kang bisan kinsa nga nagbistig sako ang pagsulod sa maong agianan.
3. Sa tanang mga lalawigan nga nahiapil sa gimbut-an sa hari, nagbangotan ug nagpuasa ang mga Judio ug kadaghanan kanila nagbistig sako ug nagligid sa abo.
4. Sa dihang gisuginlan si Ester sa iyang mga sulugoong babaye ug sa mga yunuko nga nag-atiman kaniya mahitungod kang Mardoqueo, naguol siya pag-ayo. Gipadad-an niya si Mardoqueo ug mga bisti aron iilis sa bisti niyang sako apan wala kini dawata ni Mardoqueo.
5. Unya gipatawag ni Ester si Hatac, usa sa mga yunuko sa hari nga gipaalagad kang Ester, ug iyang gipaadto si Hatac kang Mardoqueo aron pagpakisayod kon unsay hinungdan sa iyang gibuhat.
6. Giadto ni Hatac si Mardoqueo didto sa hawanan sa siyudad atbang sa ganghaan sa palasyo
7. ug gisuginlan siya ni Mardoqueo sa tanan lakip sa kuwarta nga gisaad ni Haman nga iyang ihatag sa hari agig bayad sa pagpatay sa tanang Judio.
8. Gihatagan usab siya ni Mardoqueo ug kopya sa sugo sa hari nga gipakanaog didto sa Susa nga patyon ang tanang Judio. Gihatag kini ni Mardoqueo kang Hatac aron ipakita ug isaysay kini ni Hatac kang Ester ug ipahangyo si Ester sa pag-adto sa hari aron pagpangaliyupo sa hari alang sa mga Judio nga mao ang katawhan ni Ester.
9. Busa gisuginlan ni Hatac si Ester sa tanang gisulti ni Mardoqueo.
10. Unya gisugo siya ni Ester pagsulti kang Mardoqueo:
11. “Ang tanang mga alagad sa hari ug ang katawhan sa mga lalawigan nga ubos sa iyang pagmando nasayod nga kon may tawo nga moatubang sa hari nga wala ipatawag, patyon ang maong tawo, gawas niadtong pahikapon sa hari sa bulawang sitro. Ug ako wala gayod ipatawag sa hari sulod na karon sa 30 ka adlaw.”
12. Ilang gisuginlan si Mardoqueo sa gisulti ni Ester.
13. Unya gisultihan sila ni Mardoqueo sa iyang tubag kang Ester nga mao kini: “Ayaw paghunahuna nga makalingkawas ka sa dangatan sa tanang mga Judio tungod lamang kay nagpuyo ka sa palasyo sa hari.
14. Kon magpakahilom ka lamang niining panahon sa kalisdanan, lain ang moluwas sa mga Judio apan ikaw ug ang imong banay malaglag. Kinsay nasayod nga nahimo kang rayna tungod ug alang sa panahon nga sama niini?”
15. Unya gisugo sila ni Ester sa pagdala sa iyang tubag kang Mardoqueo nga mao kini:
16. “Tigoma ang tanang Judio sa Susa ug pagpuasa kamo alang kanako sulod sa tulo ka adlaw ug tulo ka gabii. Magpuasa usab ako ug ang akong mga sulugoong babaye. Unya moadto ako sa hari bisag supak kini sa balaod. Ug kon mamatay ako, mamatay ako.”
17. Unya milakaw si Mardoqueo ug gituman niya ang tanang gisugo kaniya ni Ester.