1. Miabot ang ika-13 nga adlaw sa ika-12 nga bulan nga mao ang bulan sa Adar diin ang sugo sa hari tumanon na. Niini mismong adlawa ang mga kaaway sa mga Judio nagtuo nga ilang maulipon ang mga Judio apan sila hinuon ang naulipon sa mga Judio.
2. Ang mga Judio nagtigom sulod sa ilang siyudad sa mga lalawigan ni Hari Ahasuero aron pagdakop kang bisan kinsa nga buot modaot kanila. Walay nakasukol kanila kay nangahadlok man ang mga tawo kanila.
3. Ang tanang mga pangulo sa mga lalawigan ug ang mga kadagkoan ug ang mga gobernador ug ang mga opisyal sa hari mitabang sa mga Judio tungod sa ilang kahadlok kang Mardoqueo.
4. Sa palasyo sa hari nahimong dakong tawo si Mardoqueo ug mikaylap ang iyang kabantog sa tanang lalawigan kay si Mardoqueo nag-anam man kagamhanan.
5. Busa gipamatay sa mga Judio ang tanan nilang kaaway ug gibuhat nila ang bisan unsa nga ilang gusto.
6. Sa Susa mismo, ang ulohang siyudad, nakapatay ang mga Judio ug 500 ka tawo
7. lakip si Parsandata, si Dalfon, si Aspata,
8. si Porata, si Adalia, si Aridata,
9. si Parmasta, si Arisai, si Aridai ug si Vaizata.
10. Sila ang napulo ka anak ni Haman nga anak ni Hamedata, ang kaaway sa mga Judio apan wala nila hilabti ang mga kabtangan.
11. Niana mismong adlawa gipahibalo ang hari sa gidaghanon sa gipamatay didto sa Susa, ang ulohang siyudad.
12. Ug miingon ang hari kang Rayna Ester, “Dinhi sa Susa, ang mga Judio nakapatayg 500 ka lalaki lakip ang napulo ka anak ni Haman. Unsa kahay ilang nabuhat sa ubang mga lalawigan? Karon, unsa may imong pangayoon kay ihatag ko kini kanimo?”
13. Miingon si Ester, “Kon mouyon ka, Mahal nga Hari, tugoti ang mga Judio sa Susa sa paghimo sumala sa sugo niining adlawa. Ipabitay usab ang napulo ka anak nga lalaki ni Haman diha sa bitayan.”
14. Busa misugo ang hari nga buhaton kini.
15. Ang mga Judio sa Susa nagtigom na usab sa ika-14 nga adlaw sa bulan sa Adar ug sa maong adlaw napatay nila ang 300 ka lalaki didto sa Susa apan wala nila hilabti ang mga kabtangan.
16. Ang ubang mga Judio nga didto sa mga lalawigan sa hari nagtigom usab ug nanalipod sa ilang kinabuhi ug napatay nila ang 75,000 sa ilang mga kaaway apan wala sila manghilabot sa kabtangan.
17. Nahitabo kini sa ika-13 nga adlaw sa bulan sa Adar ug sa ika-14 nga adlaw sa maong bulan namahulay sila ug gihimo nila kini nga adlaw sa pagsaulog ug kasadya.
18. Ang mga Judio sa Susa nagtigom sa ika-13 ug ika-14 nga adlaw ug namahulay sila sa ika-15 nga adlaw sa maong bulan sa Adar. Gihimo nila kining adlawa nga usa ka adlaw sa kasaulogan ug kasadya.
19. Ang mga Judio sa kabalangayan nga walay kota nag-isip sa ika-14 nga adlaw sa bulan sa Adar nga adlaw sa pagsaulog ug sa kasadya ug adlaw nga sila maghinatagay ug mga pagkaon.
20. Kining tanan gisulat ni Mardoqueo ug gipadad-an niyag mga sulat ang tanang mga Judio nga didto sa mga lalawigan ni Hari Ahasuero, sa duol ug sa layo.
21. Ug sila iyang gipahimangnoan sa pagsaulog sa ika-14 ug ika-15 nga adlaw sa bulan sa Adar matag tuig
22. kay mao kini ang mga adlaw nga naluwas sila sa ilang mga kaaway ug mao usab ang bulan nga ang ilang kaguol giilisag kalipay ug kasadya. Ug busa angay nga kining mga adlawa himoong adlaw sa pagsaulog ug sa kasadya, mga adlaw nga sila magrigalohay ug mga pagkaon ug mohatag ug gasa ngadto sa mga kabos.
23. Busa gituman sa mga Judio ang nasugdan na nila pagtuman sumala sa gisulat kanila ni Mardoqueo.
24. Si Haman nga kaliwat ni Agag ug anak ni Hamedata ug kaaway sa tanang mga Judio naglaraw sa pagpatay kanila pinaagi sa Pur o ripa aron pagpili ug adlaw sa pagpuo sa mga Judio.
25. Apan kay nagpakiluoy man si Ester sa hari, nagsulat ang hari ug sugo nga ang daotang laraw ni Haman adto ipahamtang kang Haman mismo ug nga ang iyang mga anak nga lalaki bitayon.
26. Busa kining adlawa ginganlan nilag Purim, gikan sa pulong nga “pur.” Ug busa tungod sa nahimutang sa sulat ug sa ilang giantos tungod niini,
27. nagkasabot ang mga Judio ug ang ilang mga kaliwat ug ang tanan nga mikuyog kanila sa pagsaulog gayod niining duha ka adlaw sa gitakda nga panahon matag tuig.
28. Kining mga adlawa sa Purim angay nga handomon sa tanang panimalay nga Judio sa tanang kaliwatan diha sa tanang lalawigan ug siyudad sa tanang katuigan sa walay saylo hangtod sa hangtod.
29. Unya si Rayna Ester, ang anak nga babaye ni Abihail ug si Mardoqueo nga Judio nagsugo pinaagi sa usa ka sulat aron pagdason sa ikaduhang sulat mahitungod sa Purim.
30. Gisulatan usab ang tanang Judio sa 127 ka lalawigan sa gingharian ni Ahasuero uban ang panghinaot sa kalinaw ug sa kamatuoran.
31. Gihangyo usab niining mga sulata nga kining mga adlawa sa Purim tumanon sa gitakda nga panahon sumala sa sugo ni Mardoqueo nga Judio ug sa rayna nga si Ester nga giluwatan alang kanila ug sa ilang kaliwatan, labina ang bahin sa ilang mga pagpuasa ug mga pagbangotan.
32. Ang sugo ni Rayna Ester maoy naghimo niining tulomanon sa Purim ug gisulat kini.