1. Si Manases nagpanuigon ug 12 sa dihang misugod siya paghari ug naghari siya didto sa Jerusalem sulod sa 55 ka tuig.
2. Gibuhat niya ang daotan atubangan sa Ginoo ug gisunod niya ang daotang binuhatan sa kanasoran nga gihinginlan sa Ginoo aron mapanag-iya sa mga Israelita ang ilang yuta.
3. Gitukod niya pag-usab ang mga halaran sa mga diosdios nga gigun-ob sa iyang amahan nga si Ezequias ug nagtukod siyag mga halaran alang sa mga Baal. Naghimo usab siyag mga larawan alang sa diosa nga si Asera ug gisimba niya ang mga bituon ug gialagaran.
4. Nagtukod siyag mga halaran diha sa Templo sa Ginoo nga unta miingon man ang Ginoo, “Adto sa Jerusalem simbaha ang akong ngalan sa walay kataposan.”
5. Ug nagtukod siyag mga halaran alang sa tanang bituon diha sa duha ka hawanan sa Templo sa Ginoo.
6. Ug gisunog niya ang iyang mga anak ingon nga halad didto sa Walog sa Hinom. Mituo siya sa mga tagnatagna, salamangka, diwata ug lamatlamat. Nagpatuyang siya pagbuhat ug daotan atubangan sa Ginoo nga nakahagit sa iyang kasuko.
7. Ug ang mga larawan sa diosdios nga iyang gibuhat gibutang niya didto sa Templo sa Dios sa dapit diin miingon ang Dios kang David ug sa iyang anak nga si Solomon, “Niining Temploha sa Jerusalem nga gipili ko gikan sa tanang banay sa Israel, ipaila ko ang akong ngalan hangtod sa kahangtoran.
8. Dili na ako motugot nga biyaan sa Israel kining yuta nga gihatag ko sa inyong katigulangan kon tumanon lamang nila ang tanan kong gisugo kanila, ang tanang balaod, mga lagda ug mga tulomanon nga gihatag ko pinaagi kang Moises.”
9. Giangin ni Manases sa pagpakasala ang Juda ug ang mga nagpuyo sa Jerusalem busa nahimo silang mas daotan pa kay sa kanasoran nga gilaglag sa Ginoo aron mapanag-iya sa mga Israelita ang ilang yuta.
10. Mipahimangno ang Ginoo kang Manases ug sa iyang katawhan apan wala sila manumbaling.
11. Busa gipasulong sa Ginoo nganha kanila ang mga pangulo sa kasundalohan sa hari sa Asiria ug gikaw-itan nila si Manases ug gigapos sa kadenang bronsi ug gibihag ngadto sa Babilonia.
12. Ug sa panahon nga diha siya sa kalisdanan, nag-ampo siya sa Ginoo nga iyang Dios ug nagpaubos siya pag-ayo.
13. Nag-ampo siya sa Dios ug gidungog ang iyang pangamuyo ug gidala siya balik sa Jerusalem ngadto sa iyang gingharian. Unya nakaamgo si Manases nga ang Ginoo mao diay ang Dios.
14. Human niini, nagtukod siyag kota dapit sa gawas sa Siyudad ni David sa kasadpan sa Gihon, gikan sa walog ngadto sa pultahan hangtod sa ganghaan nga ginganlag Ganghaan sa Isda ug gipadayon kini libot sa Opel. Gihimo niya kini nga habog kaayo ug gibutangan usab niyag pangulo sa kasundalohan ang tanang kinutaan nga siyudad sa Juda.
15. Ug gikuha niya gikan sa Templo sa Ginoo ang mga diosdios. Gipangguba usab niya ang mga halaran nga iyang gitukod didto sa bungtod nga nahimutangan sa Templo sa Ginoo ug gilabay kini sa gawas sa siyudad.
16. Giuli usab niya ang halaran sa Ginoo didto sa nahimutangan niini ug naghalad siya ug mga mananap ug mga halad sa pakigdait ug pagpasalamat ug gimandoan niya ang Juda sa pag-alagad sa Ginoo, ang Dios sa Israel.
17. Bisan pag ang mga tawo nagpadayon sa paghalad ug mga mananap diha sa mga halaran sa mga diosdios, gihalad nila kini alang lamang sa Ginoo nga ilang Dios.
18. Ang ubang mga buhat ni Manases ug ang iyang pag-ampo ngadto sa Dios ug ang mga pulong sa mga propeta nga misulti kaniya sa ngalan ni Yahweh, ang Dios sa Israel, nahisulat sa Kasaysayan sa mga Hari sa Israel.
19. Ug ang iyang pag-ampo ug ang pagtubag sa Dios sa iyang pangamuyo ug ang tanan niyang kasal-anan ug ang iyang pagkadili matinuohon ug ang mga dapit nga gitukoran niya sa mga halaran alang sa mga diosdios, ang mga simbolo sa diosa nga si Asera, ang mga larawan nga iyang gihimo sa wala pa siya magpaubos sa iyang kaugalingon atubangan sa Ginoo nahisulat sa Kasaysayan sa mga Propeta.
20. Si Manases namatay ug gilubong nila siya diha sa iyang palasyo. Si Amon nga iyang anak maoy mipuli kaniya sa paghari.
21. Si Amon nagpanuigon ug 22 sa pagsugod niya paghari ug naghari siya sa Jerusalem sulod sa duha ka tuig.
22. Gihimo niya ang daotan atubangan sa Ginoo sama sa gibuhat sa iyang amahan. Naghalad si Amon ug mga mananap sa tanang larawan nga gihimo sa iyang amahan ug gisimba niya sila.
23. Ug wala siya magpaubos atubangan sa Ginoo, dili sama sa gibuhat sa iyang amahan. Nagpadayon hinuon siya sa pagpakasala.
24. Unya ang iyang mga alagad naglaraw ug daotan batok kaniya ug gipatay siya diha sa iyang balay.
25. Apan gipatay sa katawhan sa Juda ang tanan nga may kalabotan sa pagpatay kang Hari Amon ug gihimo sa mga tawo nga hari si Josias nga iyang anak puli kaniya.