1. Die Here het vir Moses gesê:
2. “Maak vir jou twee trompette van uitgerolde silwer. Gebruik hulle om die gemeenskap bymekaar te roep. Dit moet ook die teken wees om die kamp af te slaan.
3. As al twee gelyk blaas, sal dit die teken wees dat almal by die ingang van die tabernakel bymekaar moet kom.
4. Wanneer net een blaas, is dit die teken dat net die leiers van die stamme na jou toe moet kom.
5. “Wanneer jy een keer hard blaas, sal die kamp aan die oostekant eerste begin oppak om te trek.
6. Wanneer jy die tweede keer blaas, sal die kamp aan die suidekant begin gereedmaak om te gaan. Jy moet dan ’n tweede teken blaas om te begin beweeg.
7. Wanneer jy die gemeenskap bymekaar wil roep, moet jy weer ’n ander soort sein gee.
8. Net Aäron se seuns, die priesters, mag die trompet blaas. Dit is ’n onveranderlike reëling vir al die geslagte.