13. Hy was daar in die wildernis vir veertig dae terwyl Hy getoets is deur die teëstander. Hy was saam met die wilde diere en die engele het Hom bedien.
14. Nadat Yoganan gevang is, het Yeshua na die Galil gekom en die goeie boodskap van die Koninkryk van God verkondig
15. en gesê dat die tyd tot volheid gekom het en dat die Koninkryk van God naby gekom het; draai om na God toe en vertrou in die goeie boodskap.
16. Terwyl Hy langs die see van Galila loop, sien Hy vir Shim’on en Andreas, sy broer, besig om ’n net in die see te gooi, want hulle was vissers
17. en Yeshua sê vir hulle: “Kom agter My aan en Ek sal julle vissers van mense maak”
18. en dadelik het hulle hul nette laat staan en Hom gevolg.
19. ’n Entjie verder aan, sien Hy vir Ya’akov, die seun van Zavdai en Yoganan, sy broer, asook dié in die boot besig om hulle nette heel te maak
20. en Hy het hulle geroep en dadelik het hulle hul vader, Zavdai, in die skuit saam met die huurlinge laat staan en Hom gevolg.
21. Toe hulle K’far-Nagum binnegekom het, het Hy dadelik, op die Shabbat, in hulle bymekaarkomplek lering gegee
22. en hulle was stomgeslaan oor Sy leer, want Hy het hulle geleer soos Een wat outoriteit het en nie soos hulle leraars van die wet nie.
23. Daar was in hulle bymekaarkomplek ’n man met ’n vuil gees in hom en hy het uitgeskree
24. en gesê: “Wat wil U van ons hê, Yeshua, Natzerener (vanaf Natzeret)? Het U gekom om ons te vernietig? Ek weet Wie U is: die Afgesonderde Een van God!”
25. Yeshua het hom beveel en gesê: “Hou jou mond toe en gaan uit hom uit!”
26. Die vuil gees het hom neergegooi en met ’n harde stem geskree en uit hom uitgegaan.