6. Dan moet hy sy vinger in die bloed steek en hy moet die bloed sewe maal voor die gordyn van die gewyde plek spat.
7. Daarna moet hy ’n bietjie van die bloed smeer aan die horings van die wierook-altaar, daar voor die Here in die tent, en dan moet hy al die bloed wat oorbly, uitgooi teen die onderkant van die brandoffer-altaar voor die tent.
8. Dan moet hy al die vet van die sonde-offerbul uithaal. Dit is die netvet, die vet aan die binnegoed,
9. die twee niere saam met die niervet aan die kruis, en die punt van die lewer wat hy saam met die niere uithaal.
10. Hy moet dit doen soos hy gedoen het met die dier vir die ete-offer, en hy moet dit op die brandoffer-altaar verbrand.
11. Maar hy moet die bul se vel, en ook al sy vleis, sy kop en pote, sy binnegoed en sy pensmis,
12. die hele bul, buite die kamp neem na ’n rein plek, die ashoop. Daar moet hy dit verbrand op ’n houtvuur.
13. “Miskien het die hele volk Israel sonde gedoen, maar hulle weet dit nie, hulle het iets gedoen teen een van die gebooie van die Here, iets wat ’n mens nie mag doen nie, en hulle het skuldig geword.
14. Wanneer hulle dan uitvind dat hulle die sonde gedoen het, dan moet die volksvergadering ’n bul gee om ’n sonde-offer te wees. Hulle moet die bul bring voor die tent waar die Here aan die Israeliete verskyn.
15. Die leiers van die vergadering moet hulle hande daar voor die Here op die kop van die bul sit, en hulle moet die bul slag.
16. Die gesalfde priester moet ’n bietjie van die bul se bloed in die tent bring, die tent waar die Here aan die Israeliete verskyn.
17. Hy moet sy vinger in die bloed steek en hy moet dit sewe maal voor die gordyn spat, daar voor die Here.
18. Dan moet hy van die bloed aan die horings van die altaar smeer, daar voor die Here in die tent. En hy moet al die bloed wat oorbly, uitgooi teen die onderkant van die altaar wat voor die tent is.
19. Dan moet hy al die vet uithaal wat in die bul is en hy moet dit op die altaar verbrand.
20. Hy moet met hierdie bul doen soos met die ander bul. So moet hy versoening doen vir die mense in die vergadering, sodat die Here hulle sal vergewe.