18. Wathi uLeya, UThixo undinikile umvuzo wam, ngenxa yokuba indoda yam ndiyinike umkhonzazana wam.
19. Wamthiya igama elinguIsakare.* Wabuya wamitha uLeya, wamzalela uYakobi unyana wesithandathu.
20. Wathi uLeya, UThixo undiphe isipho esilungileyo; okwesi sihlandlo indoda yam iya kuhlala nam, kuba ndiyizalele oonyana abathandathu. Wamthiya igama elinguZebhulon.*
21. Emveni koko wazala intombi, wayithiya igama elinguDina.*
22. Ke kaloku uThixo wamkhumbula uRakeli, uThixo wamphulaphula, wasivula isizalo sakhe.
23. Wamitha, wazala unyana, wathi, UThixo ukususile ukungcikivwa kwam.
24. Wamthiya igama elinguYosefu,* wathi, UYehova makongezelele omnye unyana.
25. Kwathi, xa uRakeli ebemzele uYosefu, wathi uYakobi kuLabhan, Ndíndulule ndiye endaweni yakowethu, ezweni lakowethu.
26. Ndínike abafazi bam nabantwana bam, endikukhonze ngenxa yabo, ndihambe; kuba wena uyayazi inkonzo yam endikukhonze ngayo.
27. Wathi uLabhan kuye, Ukuba kaloku ndibabalwe nguwe, hlala; ndihlabé ukuthi uYehova undisikelele ngenxa yakho.
28. Wathi, Ndímisele kakuhle umvuzo wakho ondifaneleyo, ndikunike.
29. Wathi kuye, Uyalwazi nawe uhlobo lokukukhonza kwam, nohlobo lokuhlala kwempahla yakho nam.