10. Xa athe umntu wanika ummelwane wakhe iesile, nokuba yinkomo, nokuba yigusha, nokuba yiyiphi into ezitho ziné, ukuba ayigcine; yaza yafa, mhlawumbi yaphuka, mhlawumbi yathinjwa, kungaboni bani:
11. makubekho ukufunga uYehova phakathi kwabo bobabini, ukuba akayiphathanga impahla yommelwane wakhe; makamkele oko umniniyo, loo mntu angayimiseli.
12. Ukuba ibiwe yabiwa ikuye, woyimisela kumniniyo.
13. Ukuba iqwengiwe, woyizisa ibe lingqina; makangayimiseli into eqwengiweyo.
14. Xa athe umntu waboleka inkomo kummelwane wakhe, yaza yaphuka, mhlawumbi yafa, engekho umniniyo, makayimisele.
15. Ukuba ithe yenzakala ekho umniniyo, makangayimiseli; ukuba ibithe yaqeshwa, ibé ihambele ingqesho yayo.
16. Xa athe umntu warhwebesha intombi engàganiweyo, walala nayo, woyilobola ibe ngumkakhe.
17. Ukuba uyise wayo walile kanye ukumnika, makarhole imali njengekhazi lazo iintombi.
18. Umkhafulikazi uze ungamyeki adle ubomi.
19. Bonke abathe balala inkomo, mababulawe bafe.
20. Obingelela kuthixo ongenguye uYehova yedwa, makasingelwe phantsi.
21. Umphambukeli uze ungamxinzeleli phantsi, ungamxini; kuba naningabaphambukeli nani ezweni laseYiputa.
22. Yonke into engumhlolokazi nenkedama uze ungayicinezeli.
23. Ukuba ùthe wabacinezela nangayiphi na indlela, bakhala kum, ndokuva ukukhala kwabo;
24. uvuthe umsindo wam, ndinibulale ngekrele; babe ngabahlokokazi abafazi benu, babe ziinkedama abantwana benu.