17. Ai diskutonte në sinagogë me judenjtë dhe me paganët e kthyer në besimin e judenjve, dhe çdo ditë fliste në sheshin e tregut me ata që ndodheshin aty.
18. Disa filozofë epikurianë e stoikë po diskutonin me të.Disa thanë: «Çfarë po përpiqet të na thotë ky fjalaman?».Disa të tjerë thanë: «Duket se është lajmëtar hyjnish të huaja». Këtë e thanë sepse ai po predikonte ungjillin e Jezuit dhe ngjalljen.
19. Atëherë e morën, e çuan në Areopag dhe e pyetën: «A mund ta dimë çfarë është ky mësim i ri për të cilin po flet?
20. Na tingëllojnë si gjëra të çuditshme, prandaj dëshirojmë të dimë ç’kuptim kanë ato».
21. Në të vërtetë, të gjithë athinasit e të huajtë që jetonin aty, nuk e kalonin kohën ndryshe veçse duke treguar apo duke dëgjuar ndonjë të re.
22. Atëherë Pali u ngrit në mes të Areopagut e tha:«Athinas, unë po shoh se ju jeni njerëz shumë fetarë në gjithçka.
23. Duke ecur nëpër qytet e duke parë me vëmendje vendet e shenjta ku ju adhuroni, gjeta edhe një altar me mbishkrimin: “Perëndisë së panjohur.” Atë që ju e adhuroni si të panjohur, unë po jua shpall.
24. Perëndia që bëri botën dhe gjithçka që gjendet në të, ai që është Zoti i qiellit e i tokës, nuk banon në tempuj të ndërtuar me duart e njerëzve.
25. Meqenëse ai vetë u jep njerëzve jetë, frymë dhe gjithçka, nuk pret që t’i shërbejnë njerëzit, a thua se ka nevojë për ndonjë gjë.