kapitujt

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16

Dhjata e Re

Marku 9 Së Bashku (ALNT)

1. Jezui u tha: «Me të vërtetë po ju them se disa nga ata që janë këtu nuk do ta provojnë vdekjen pa e parë mbretërinë e Perëndisë, duke ardhur me fuqi».

Shndërrimi i Jezuit

2. Pas gjashtë ditësh Jezui mori me vete Pjetrin, Jakobin dhe Gjonin e i çoi në një mal të lartë, në një vend të veçuar. Atëherë ai u shndërrua para tyre

3. e rrobat iu bënë vezulluese dhe aq të bardha, sa askush mbi tokë nuk mund t’i zbardhte aq shumë.

4. Pastaj atyre iu shfaqën Elia me Moisiun, që po flisnin me Jezuin.

5. Pjetri i tha Jezuit: «Mësues, sa mirë që jemi këtu! Le të ngremë tri tenda, një për ty, një për Moisiun e një për Elian».

6. Në të vërtetë nuk dinte ç’të thoshte, sepse u kishte hyrë tmerri.

7. Atëherë doli një re që i mbuloi me hijen e saj dhe nga reja u dëgjua një zë: «Ky është Biri im i dashur. Dëgjojeni!».

8. Dhe, befas, kur shikuan përreth, nuk panë askënd përveç Jezuit që ishte me ta.

9. Kur po zbrisnin nga mali, Jezui i urdhëroi të mos i tregonin askujt çfarë kishin parë, derisa Biri i njeriut të ngjallej prej të vdekurve.

10. Ata e mbajtën fjalën dhe pyesnin veten: ç’do të thotë të ngjallesh prej të vdekurve?

11. Pastaj e pyetën Jezuin: «Përse thonë skribët se duhet të vijë më parë Elia?».

12. Ai u tha:«Është e vërtetë se Elia do të vijë më parë për të vënë gjithçka në vendin e vet. Po përse thotë Shkrimi i shenjtë se Biri i njeriut do të vuajë shumë dhe do të përçmohet?

13. Megjithatë unë po ju them se Elia ka ardhur dhe me të bënë çfarë deshën, ashtu si Shkrimi i shenjtë thotë për të».

Shërimi i djaloshit të pushtuar nga një shpirt i ndyrë

14. Kur erdhën te dishepujt e tjerë, panë rreth tyre një turmë të madhe dhe skribët që po diskutonin me ta.

15. Tërë ajo turmë u habit kur e pa Jezuin. Njerëzit vrapuan tek ai dhe e përshëndetën.

16. Jezui i pyeti: «Çfarë po diskutoni me ta?».

17. Njëri nga turma iu përgjigj: «Mësues, të kam sjellë tim bir, se e mundon një shpirt që nuk e lë të flasë.

18. Kudo që e kap, e përplas përdhe dhe ai nxjerr shkumë nga goja, kërcëllin dhëmbët e mpihet. U thashë edhe dishepujve të tu që t’ia dëbojnë, por nuk mundën».

19. Jezui tha: «O brezni e pafe! Edhe sa kohë do të jem me ju? Deri kur do t’ju duroj? Sillmani këtu!».

20. Ata e sollën djaloshin tek ai. Kur e pa Jezuin, shpirti e shkundi menjëherë djalin. Ai ra përdhe dhe u rrotullua duke i dalë shkumë nga goja.

21. Jezui e pyeti babanë e djalit: «Sa kohë ka që është kështu?».Ai u përgjigj: «Që në fëmijëri.

22. Disa herë e ka hedhur në zjarr dhe në ujë për ta vrarë. Nëse mundesh, ki dhembshuri për ne dhe na ndihmo!».

23. Jezui i tha: «Nëse mundem? Gjithçka është e mundur për atë që beson».

24. Menjëherë babai i fëmijës thirri: «Besoj o Zot. Ndihmomë në besimin tim të pakët!».

25. Kur pa Jezui se turma po mblidhej me vrap, e qortoi shpirtin e ndyrë dhe i tha: «Shpirt shurdh e memec, po të urdhëroj, dil prej tij e mos hyr më kurrë!».

26. Shpirti bërtiti dhe si e shkundi mirë, doli prej tij e djali mbeti si i vdekur, saqë të gjithë thoshin: «Ka vdekur».

27. Por Jezui e mori për dore dhe e ngriti. Atëherë djali u ngrit në këmbë.

28. Kur hyri në shtëpinë ku po rrinin, dishepujt e pyetën veçmas: «Përse ne nuk mundëm ta dëbonim?».

29. Jezui u tha: «Ky lloj shpirti nuk mund të dëbohet ndryshe, përveçse me lutje».

Jezui paralajmëron përsëri vdekjen dhe ngjalljen e vet

30. Pastaj u larguan që aty dhe kaluan nëpër Galile. Jezui nuk donte ta merrte vesh njeri.

31. Ai po mësonte dishepujt e tij dhe u tha: «Biri i njeriut do të dorëzohet në duart e njerëzve, ata do ta vrasin dhe, pas tri ditësh, ai do të ngjallet».

32. Por ata nuk i kuptuan këto fjalë dhe kishin frikë ta pyesnin.

Kush është më i madhi

33. Arritën në Kafarnaum dhe kur hyri në shtëpinë ku po rrinin, i pyeti: «Për çfarë po bisedonit me njëri-tjetrin gjatë rrugës?».

34. Ata heshtën, sepse gjatë rrugës kishin biseduar se kush nga ata ishte më i madhi.

35. Pasi u ul, i thirri të dymbëdhjetët dhe u tha: «Nëse dikush dëshiron të jetë i pari, le të bëhet i fundit i të gjithëve dhe shërbëtori i të gjithëve».

36. Pastaj mori një fëmijë, e vuri mes tyre dhe duke e marrë në krahë, u tha:

37. «Kush pranon në emrin tim një fëmijë si ky, më pranon mua dhe kush më pranon mua, nuk më pranon mua, por atë që më ka dërguar».

Kush nuk është kundër nesh është me ne

38. Gjoni i tha Jezuit: «Mësues, pamë një njeri që dëbonte djajtë në emrin tënd dhe ia ndaluam, sepse nuk vinte pas nesh».

39. Por Jezui i tha:«Mos ia ndaloni, se askush nuk mund të flasë keq për mua sapo bën një vepër të fuqishme në emrin tim.

40. Kush nuk është kundër nesh, është me ne.

41. Nëse dikush do t’ju japë të pini një gotë ujë për shkak se jeni të Krishtit, me të vërtetë po ju them se ai nuk do ta humbasë shpërblimin e tij».

Mos u bëj shkaktar i mëkatit

42. «Nëse dikush shtyn në mëkat njërin prej këtyre të vegjëlve që besojnë në mua, për atë do të ishte më mirë të lidhte në qafë një gur të madh mulliri dhe të hidhej në det.

44 . ku tenja nuk ngordh dhe zjarri nuk shuhet..

46 . ku tenja nuk ngordh dhe flaka nuk shuhet..

47. Nëse syri të çon në mëkat, nxirre! Është më mirë të hysh me një sy në mbretërinë e Perëndisë, sesa t’i kesh të dy sytë e të të hedhin në ferr,

48. atje ku tenja nuk ngordh dhe zjarri nuk shuhet.

49. Në të vërtetë, gjithçka do të kripet me zjarr.

50. Kripa është e mirë, por nëse e humbet shijen, si do t’ia ktheni? Kini kripë në veten tuaj dhe jetoni në paqe me njëri-tjetrin».