1. Pastaj Jezui vazhdoi të përshkonte Galilenë. Ai nuk donte të kalonte nëpër Jude, pasi judenjtë kërkonin ta vrisnin.
2. Po afronte festa e Kasolleve, një nga festat e judenjve,
3. dhe vëllezërit e vet i thanë: «Largohu prej këtej dhe shko në Jude, që edhe dishepujt e tu të shohin veprat që bën!
4. Kush kërkon të jetë i njohur, nuk i fsheh ato që bën. Nëse ti bën vepra të tilla, shfaqja veten botës!».
5. Në të vërtetë as vëllezërit e tij nuk besonin në të.
6. Atëherë Jezui u tha: «Koha ime nuk ka ardhur ende, ndërsa për ju çdo kohë është e përshtatshme.
7. Bota nuk mund t’ju urrejë ju, ndërsa mua më urren, sepse unë dëshmoj se veprat e saj janë të liga.
8. Ju, shkoni në festë! Unë nuk do të vij në këtë festë, sepse koha ime nuk ka ardhur ende».
9. U tha këto dhe qëndroi në Galile.
10. Pasi vëllezërit e tij shkuan në festë, shkoi edhe Jezui, jo haptas por fshehurazi.
11. Judenjtë e kërkonin në festë dhe pyesnin: «Ku është ai?».
12. Nëpër turmë pëshpëritej shumë për të. Disa thoshin: «Është i mirë». Të tjerë thoshin: «Jo. Ai po mashtron turmën!»,
13. por asnjë nuk fliste hapur për të, sepse kishin frikë nga judenjtë.
14. Nga mesi i festës Jezui shkoi në tempull dhe filloi të mësonte njerëzit.
15. Judenjtë habiteshin dhe thoshin: «Nga i njeh ky Shkrimet e shenjta pa ia mësuar njeri?».
16. Jezui u përgjigj:«Mësimi im nuk është i imi, por i atij që më dërgoi.
17. Kush dëshiron të bëjë vullnetin e tij do ta kuptojë nëse mësimi im është prej Perëndisë apo nëse unë flas nga vetja ime.
18. Kush flet nga vetja kërkon lavdi për vete, ndërsa kush kërkon lavdinë e atij që e dërgoi, thotë të vërtetën dhe në të nuk ka gënjeshtër.
19. A nuk jua dha Moisiu ligjin? Megjithatë asnjë prej jush nuk e zbaton. Përse kërkoni të më vrisni?».
20. Turma iu përgjigj: «Ty të ka pushtuar djalli. Kush kërkon të të vrasë?».
21. Jezui u tha:«Një mrekulli bëra dhe u habitët të gjithë.
22. Moisiu ju dha rrethprerjen, e cila në fakt nuk është dhënë nga Moisiu, por nga etërit, e, megjithatë, ju e rrethpritni njeriun të shtunën.
23. Nëse një njeri rrethpritet të shtunën, që të mos shkelet ligji i Moisiut, përse zemëroheni me mua, sepse shërova tërësisht një njeri të shtunën?
24. Mos gjykoni nga pamja e jashtme, por gjykoni me drejtësi».
25. Disa nga Jerusalemi thoshin: «A nuk është ky ai që e kërkojnë për ta vrarë?
26. Ja, ai po flet lirisht dhe nuk i thonë gjë! A mos kanë pranuar me të vërtetë krerët se ky është Krishti?
27. Por ne e dimë nga është ky, ndërsa kur të vijë Krishti, askush nuk do ta dijë nga është».
28. Atëherë Jezui, ndërsa mësonte njerëzit në tempull, thirri: «Po, mua më njihni dhe e dini nga jam. Megjithatë unë nuk kam ardhur nga vetja ime, por ai që më dërgoi është i vërtetë dhe atë ju nuk e njihni.
29. Por unë e njoh atë, sepse vij prej tij dhe ai më dërgoi».
30. Atëherë kërkonin ta kapnin, por askush nuk vuri dorë mbi të, pasi nuk i kishte ardhur ende koha.
31. Shumë nga turma besuan në Jezuin dhe thoshin: «A thua kur të vijë Krishti do të bëjë më shumë mrekulli se ky?».
32. Farisenjtë dëgjuan se turma pëshpëriste këto gjëra për Jezuin, prandaj, së bashku me kryepriftërinjtë, dërguan roja për ta kapur.
33. Atëherë Jezui u tha atyre: «Edhe për pak kohë jam me ju e pastaj do të shkoj tek ai që më dërgoi.
34. Do të më kërkoni dhe nuk do të më gjeni, sepse ju nuk mund të vini atje ku jam unë».
35. Judenjtë pyesnin njëri-tjetrin: «Ku ka ndër mend të shkojë ky, që ne nuk mund ta gjejmë? Mos ka ndër mend të shkojë te judenjtë e shpërndarë mes grekëve dhe të mësojë grekët?
36. Ç’do të thonë fjalët: “do të më kërkoni dhe nuk do të më gjeni, sepse ju nuk mund të vini atje ku jam unë”».
37. Ditën e fundit dhe më të madhen e festës Jezui u ngrit në këmbë dhe thirri: «Nëse dikush ka etje, le të vijë tek unë dhe të pijë!
38. Kush beson në mua, lumenj uji të gjallë do të rrjedhin nga brenda tij. Kështu thotë Shkrimi i shenjtë».
39. Këtë e tha për Shpirtin e Shenjtë që do të merrnin ata që do të besonin në të. Shpirti i Shenjtë nuk ishte dhënë ende, sepse Jezui ende nuk ishte ngritur në lavdi.
40. Kur dëgjuan këto fjalë, disa njerëz nga turma thanë: «Ky është me të vërtetë profeti»,
41. të tjerë thoshin: «Ky është Krishti», ndërsa të tjerë: «Vallë nga Galileja vjen Krishti?
42. A nuk thotë Shkrimi i shenjtë: “Krishti vjen nga fara e Davidit dhe nga Betlehemi, fshati nga ishte Davidi”?»
43. Kështu pati përçarje në turmë për shkak të Jezuit.
44. Disa prej tyre donin ta kapnin, por askush nuk vuri dorë mbi të.
45. Rojat u kthyen te kryepriftërinjtë e farisenjtë, që i pyetën: «Përse nuk e sollët?».
46. Ata iu përgjigjën farisenjve: «Kështu si ai nuk ka folur asnjëherë ndonjë njeri».
47. Farisenjtë u thanë: «Mos u mashtruat edhe ju?
48. A ka besuar në të ndonjë prej krerëve apo prej farisenjve?
49. Por kjo turmë që nuk e njeh ligjin e Moisiut është e mallkuar».
50. Nikodemi, njëri prej farisenjve që kishte shkuar më parë te Jezui, tha:
51. «A e gjykon ligji ynë ndonjë njeri pa e dëgjuar më parë dhe pa marrë vesh se çfarë ka bërë?».
52. Ata iu përgjigjën: «Mos je edhe ti nga Galileja? Kërko dhe shiko se asnjë profet nuk vjen nga Galileja».
53. Dhe secili shkoi në shtëpinë e vet.