kapitujt

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16
  17. 17
  18. 18
  19. 19
  20. 20
  21. 21

Dhjata e Re

Gjoni 16 Së Bashku (ALNT)

1. «Jua thashë këto që të mos ju tronditet besimi.

2. Do t’ju përjashtojnë nga sinagogat. Madje, po vjen ora kur kushdo që do t’ju vrasë do të mendojë se i shërben Perëndisë.

3. Dhe do t’i bëjnë këto, sepse nuk kanë njohur as Atin, as mua.

4. Por këto gjëra jua thashë që, kur të vijë koha, t’ju kujtohet që unë jua kam thënë.»«Nuk jua thashë këto që në fillim, meqenëse isha me ju.

Vepra e Shpirtit të Shenjtë

5. Por tani po shkoj tek ai që më dërgoi dhe asnjeri nga ju nuk po më pyet: “Ku po shkon?”

6. Madje, zemra juaj është mbushur me trishtim ngaqë ju thashë këto gjëra.

7. Por unë po ju them të vërtetën: Është më mirë për ju që unë të shkoj, sepse po nuk shkova unë, Ngushëlluesi nuk do të vijë te ju, ndërsa po të shkoj, atëherë do t’jua dërgoj.

8. Kur të vijë, ai do ta bindë botën se është fajtore në lidhje me mëkatin, drejtësinë dhe gjykimin.

9. Në lidhje me mëkatin, sepse nuk beson në mua.

10. Në lidhje me drejtësinë, sepse unë po shkoj tek Ati dhe nuk do të më shihni më.

11. Në lidhje me gjykimin, sepse princi i kësaj bote është gjykuar.

12. Kam edhe shumë gjëra të tjera për t’ju thënë, por tani nuk mund t’i mbani.

13. Po kur të vijë Shpirti i së vërtetës, ai do t’ju drejtojë tek e gjithë e vërteta. Ai nuk do të flasë nga vetja, por do të flasë ato që do të dëgjojë dhe do t’ju njoftojë gjërat që do të ndodhin.

14. Ai do të më përlëvdojë, sepse do të marrë nga gjërat e mia dhe do t’jua lajmërojë.

15. Gjithçka që ka Ati është imja, prandaj ju thashë se do të marrë nga gjërat e mia dhe do t’jua lajmërojë.»

Trishtimi do të kthehet në gëzim

16. «Edhe pak e nuk do të më shihni më. Edhe pak pastaj e do të më shihni sërish».

17. Disa nga dishepujt i thanë njëri-tjetrit: «Ç’është kjo që na thotë: “Edhe pak e nuk do të më shihni më. Edhe pak pastaj e do të më shihni sërish” apo “Unë po shkoj tek Ati”?».

18. Ata thoshin: «Ç’është kjo “edhe pak” që thotë? Nuk po kuptojmë çfarë thotë!».

19. Jezui e kuptoi se donin ta pyesnin, ndaj u tha:«Po diskutoni me njëri-tjetrin sepse thashë: “Edhe pak e nuk do të më shihni më. Edhe pak pastaj e do të më shihni sërish”?

20. Me të vërtetë po ju them se do të qani dhe do të vajtoni, ndërsa bota do të gëzohet. Ju do të hidhëroheni, por hidhërimi juaj do të kthehet në gëzim.

21. Kur gruaja është duke lindur, hidhërohet, se i erdhi ora e dhimbjeve, po kur lind foshnja, ajo e harron vuajtjen nga gëzimi se ka lindur një njeri në botë.

22. Kështu dhe ju tani jeni të hidhëruar, po kur t’ju shoh përsëri, do t’ju gëzohet zemra dhe askush nuk do t’jua marrë gëzimin.

23. Atë ditë nuk do të më pyesni për asgjë. Me të vërtetë po ju them se çdo gjë që t’i kërkoni Atit në emrin tim, do t’jua japë.

24. Deri tani nuk keni kërkuar asgjë në emrin tim. Kërkoni dhe do të merrni, që gëzimi juaj të jetë i plotë.»

Unë e kam mundur botën

25. «Këto gjëra jua thashë me përngjasime, por po vjen koha kur nuk do t’ju flas më me përngjasime, por do t’ju flas hapur për Atin.

26. Atë ditë do të kërkoni në emrin tim dhe nuk ju them se do t’i lutem Atit për ju.

27. Vetë Ati ju do, sepse më keni dashur mua dhe keni besuar se unë kam dalë prej Perëndisë.

28. Unë kam dalë prej Atit dhe kam ardhur në botë. Po e lë përsëri botën dhe po kthehem tek Ati».

29. Dishepujt i thanë: «Ja, tani ti po flet hapur dhe nuk po thua asgjë me përngjasime.

30. Tani e dimë se ti di gjithçka dhe nuk ke nevojë që ndokush të të pyesë. Prandaj besojmë se ke dalë prej Perëndisë».

31. Jezui u përgjigj:«Tani besoni?

32. Ja ku po vjen ora dhe madje ka ardhur kur ju do të shpërndaheni secili në shtëpi të vet dhe do të më lini vetëm. Por unë nuk jam vetëm, sepse Ati është me mua.

33. Jua thashë këto që të keni paqe në mua. Në botë do të keni shtrëngime, por kini guxim! Unë e kam mundur botën!».