kapitujt

  1. 1
  2. 2
  3. 3
  4. 4
  5. 5
  6. 6

Dhjata e Re

Efesianëve 2 Së Bashku (ALNT)

Nga vdekja në jetë

1. Edhe ju ishit të vdekur për shkak të paudhësive dhe mëkateve tuaja,

2. në të cilat jetonit dikur sipas mënyrës së kësaj bote, duke iu nënshtruar prijësit që sundon mes qiellit e tokës, shpirtit që tani vepron te bijtë e mosbindjes.

3. Edhe ne dikur jetonim si ata, jepeshim pas epsheve të trupit, bënim çfarë dëshironte trupi e mendja jonë dhe natyra jonë mëkatare na kishte bërë bij të zemërimit njëlloj si të tjerët.

4. Por Perëndia, që është i pasur në mëshirë, për shkak të dashurisë së tij të madhe me të cilën na deshi,

5. na dha jetë bashkë me Krishtin, ndonëse ishim të vdekur në paudhësitë tona. Ju jeni shpëtuar me anë të hirit.

6. Perëndia na ngjalli me Jezu Krishtin dhe na uli bashkë me të në vendet qiellore.

7. Kështu, nga mirësia që tregoi për ne përmes Krishtit Jezu, ai shpalosi për epokat e ardhshme pasurinë e pamasë të hirit të tij.

8. Në të vërtetë, ju jeni shpëtuar me anë të hirit, përmes besimit dhe kjo nuk vjen prej jush, por është dhuratë nga Perëndia.

9. Ju nuk u shpëtuat prej veprave tuaja, kështu që askush të mos mburret.

10. Ne jemi vepër e Perëndisë, të krijuar përmes Krishtit Jezu për të bërë vepra të mira, të cilat Perëndia i parapërgatiti që ne t’i vëmë në jetë.

Të bashkuar me Krishtin

11. Prandaj kujtohuni se ju dikur keni qenë paganë që në lindje dhe jeni quajtur të parrethprerë nga judenjtë që quhen të rrethprerë. Ata janë rrethprerë nga dora e njeriut.

12. Në atë kohë, ju ishit pa Krishtin, nuk i përkisnit popullit të Izraelit, ishit të huaj për besëlidhjet e premtimit dhe nuk kishit shpresë e as Perëndi në këtë botë.

13. Por tani përmes Krishtit Jezu, ju që dikur ishit larg nga Perëndia, iu afruat atij me anë të gjakut të Krishtit.

14. Krishti është paqja jonë, është ai që nga paganët dhe nga hebrenjtë bëri një popull të vetëm dhe që me vdekjen e tij shembi murin që i ndante dhe që i bënte armiq.

15. Ai e shfuqizoi ligjin e urdhërimeve dhe të rregullave, që t’i bashkonte me veten paganët dhe hebrenjtë e t’i bënte një njeri të ri, duke sjellë kështu paqen mes tyre.

16. Pasi shkatërroi armiqësinë mes tyre me anë të kryqit të tij, Krishti i bashkoi ata në një trup të vetëm dhe i pajtoi me Perëndinë.

17. Ai erdhi dhe u predikoi ungjillin e paqes si juve që ishit larg nga Perëndia, ashtu edhe atyre që ishin afër tij.

18. Sepse, përmes Krishtit, si ju paganët, ashtu edhe ne hebrenjtë, mund të shkojmë tek Ati, me anë të të vetmit Shpirt të Shenjtë.

19. Prandaj ju nuk jeni më të huaj e bujtës, por jeni bashkëqytetarë me besimtarët e krishterë dhe pjesëtarë të familjes së Perëndisë.

20. Ju jeni pjesë e ndërtesës që ka si themel apostujt e profetët dhe si gur të qoshes vetë Krishtin Jezu.

21. Në të e gjithë ndërtesa lidhet mirë dhe rritet për t’u bërë një tempull i shenjtë për Zotin.

22. Përmes tij edhe ju bashkë me të tjerët po ndërtoheni për t’u bërë ndërtesa ku Perëndia banon përmes Shpirtit të Shenjtë.