kapitujt

  1. 1
  2. 2
  3. 3
  4. 4
  5. 5
  6. 6

Dhjata e Re

1 Timoteut 6 Së Bashku (ALNT)

1. Të gjithë ata që janë nën zgjedhën e skllavërisë le të tregojnë nderim për zotërinjtë e tyre, që të mos shahen emri i Perëndisë dhe mësimi ynë.

2. Ata që i kanë besimtarë zotërinjtë e tyre le të mos i shpërfillin, sepse janë vëllezër. Përkundrazi, t’u shërbejnë edhe më mirë, sepse u shërbejnë vëllezërve besimtarë e të dashur.Këto gjëra mësoju dhe këshilloju të tjerëve.

Mësimi i rremë dhe pasuria e vërtetë

3. Kush u mëson njerëzve një mësim tjetër dhe nuk ndjek fjalët e vërteta të Zotit tonë Jezu Krisht dhe mësimet e besimit tonë,

4. ai është mburravec dhe nuk di asgjë. Atij i janë bërë sëmundje debatet e kapja pas fjalëve. Nga këto vijnë smira, grindjet, fyerjet, dyshimet e liga,

5. zënkat pafund të njerëzve me mendje të shthurur, të privuar nga e vërteta dhe që e shohin besimin në Perëndinë si mjet përfitimi.

6. Besimi në Perëndinë është pasuri e madhe për atë që kënaqet me aq sa ka,

7. sepse asgjë nuk kemi sjellë në këtë botë dhe asgjë nuk mund të marrim prej saj.

8. Nëse kemi ushqim e veshmbathje, le të mjaftohemi me kaq.

9. Ata që dëshirojnë të pasurohen, bien në tundim, në kurthin e djallit dhe në shumë dëshira të marra e të dëmshme, që i fundosin njerëzit në rrënim e shkatërrim.

10. Lakmia për para është rrënja e gjithë të këqijave. Duke rendur pas parasë, disa u larguan nga besimi dhe i shkaktuan vetes shumë dhimbje.

Lufta e mirë e besimit

11. Por ti, o njeri i Perëndisë, largohu nga këto gjëra. Përkundrazi kërko drejtësinë, jetën e përkushtuar ndaj Perëndisë, besimin, dashurinë, durimin dhe zemërbutësinë.

12. Lufto luftën e mirë të besimit dhe rrok jetën e amshuar, për të cilën të thirri Perëndia e për të cilën ke dhënë dëshminë e mirë të besimit para shumë dëshmitarëve.

13. Të bëj thirrje para Perëndisë, që i jep jetë gjithçkaje dhe para Krishtit Jezu, që dha dëshminë e mirë në kohën e Ponc Pilatit,

14. që ti ta zbatosh këtë urdhërim të panjollë dhe të paqortueshëm deri në ardhjen e Zotit tonë Jezu Krisht.

15. Kur të vijë koha,ardhjen e tijdo ta tregojë Perëndia,i lumi,i vetmi sundues,mbreti i mbretërvedhe Zoti i zotërve.

16. Vetëm ai është i pavdekshëmdhe banon në dritënqë asnjeri nuk i afrohet dot.Atë nuk e ka parë asnjë njeridhe as nuk mund ta shohë.Atij i qoftënderidhe fuqia e amshuar!Amen!

17. Pasanikët e kohës së tanishme urdhëroji të mos u rritet mendja, as të mos e mbajnë shpresën në pasigurinë e pasurisë, por në Perëndinë që na jep gjithçka me zemërgjerësi për të mirën tonë.

18. Urdhëroji të bëjnë të mirën, të jenë të pasur në vepra të mira, të jenë zemërgjerë dhe të gatshëm për të dhënë.

19. Kështu ata do të grumbullojnë për vete një thesar e do të vënë themel të mirë për të ardhmen, që të marrin jetën e vërtetë.

20. O Timote, ruaje atë që të është besuar! Largohu nga fjalët e zbrazëta, që janë kundër besimit, si dhe nga kundërthëniet e së ashtuquajturës dituri,

21. të cilën disa e pranuan dhe humbën besimin.Hiri qoftë me ju!