1. Unë Pali, apostull i Krishtit Jezu, sipas urdhërit të Perëndisë, Shpëtimtarit tonë, dhe Krishtit Jezu, shpresës sonë,
2. po të shkruaj ty Timote, birit të vërtetë në besim:Hiri, mëshira dhe paqja nga Perëndia Atë dhe nga Jezu Krishti, Zoti ynë, qofshin me ty!
3. Ashtu si të porosita kur u nisa për në Maqedoni, qëndro në Efes dhe urdhëroi disa të mos u mësojnë besimtarëve një mësim tjetër
4. dhe të mos merren me mite dhe gjenealogji pafund, të cilat shkaktojnë grindje dhe nuk i shërbejnë planit shpëtimtar të Perëndisë, që e njohim përmes besimit.
5. Synimi i këtij urdhri është dashuria që vjen nga një zemër e dëlirë, nga një ndërgjegje e pastër dhe nga një besim pa hipokrizi.
6. Disa, duke shmangur këto gjëra, janë kthyer te bisedat pa kuptim.
7. Ata duan të jenë mësues të ligjit të Moisiut, pa kuptuar as ato që thonë, as ato që pohojnë me kaq siguri.
8. Ne e dimë se ligji i Moisiut është i mirë, në qoftë se njeriu e përdor si duhet.
9. Po ashtu e dimë se ligji i Moisiut nuk u dha për të drejtin, po për shkelësit dhe të pabindurit, për të ligjtë dhe mëkatarët, për të pafetë dhe profanët, për ata që vrasin babë e nënë, për vrasësit,
10. për kurvarët, për meshkujt që shkojnë me meshkuj, për pengmarrësit, për gënjeshtarët, për ata që bëjnë be të rreme dhe çfarëdo gjëje tjetër që kundërshton mësimin e shëndoshë.
11. Ky mësim është sipas ungjillit të lavdisë së të lumit Perëndi, ungjill që m’u besua mua.
12. I jam mirënjohës Krishtit Jezu, Zotit tonë, që më dha fuqi, sepse më çmoi besnik dhe më vuri në shërbim të tij,
13. ndonëse më përpara e kisha fyer, përndjekur dhe sharë. Por ai më mëshiroi sepse veprova nga padija, kur isha larg besimit të vërtetë.
14. Hiri i Zotit tonë m’u dha me tepricë bashkë me besimin dhe dashurinë që vijnë përmes Krishtit Jezu.
15. Kjo fjalë është e besueshme dhe e denjë për t’u pranuar plotësisht: Krishti Jezu erdhi në botë për të shpëtuar mëkatarët, ndër të cilët unë jam i pari.
16. Por prandaj u mëshirova, që Jezu Krishti të shfaqë në mua së pari tërë durimin, si shembull për ata që do të besojnë në të për jetën e amshuar.
17. Prandaj Mbretit të amshuar, të pavdekshmit, të padukshmit, të vetmit Perëndi, i qoftë nder dhe lavdi në shekuj të shekujve! Amen!
18. Këtë detyrë po ta besoj ty, o biri im Timote, sipas profecive që janë thënë për ty. Ti, i mbështetur në to, lufto luftën e mirë!
19. Ruaje besimin dhe ndërgjegjen e pastër, që disa e hodhën tej dhe e mbytën kështu anijen e besimit.
20. Ndër këta janë Himeneu dhe Aleksandri, të cilët ia dorëzova Satanit, me qëllim që të mësojnë të mos fyejnë Perëndinë.