23. Një numër i madh njerëzish i çuan oferta Zotit në Jeruzalem dhe sende të çmuara Ezekias, mbretit të Judës, i cili qysh atëherë u madhërua në sytë e tërë kombeve.
24. Në ato ditë Ezekia u sëmur për vdekje. Ai iu lut Zotit, që i foli dhe i dha një shenjë.
25. Por Ezekia nuk iu përgjigj mirësisë që iu bë atij, sepse zemra e tij ishte bërë krenare; prandaj mbi të, mbi Judën dhe mbi Jeruzalemin ra zemërimi i Zotit.
26. Pastaj Ezekia u përul për krenarinë e zemrës së tij, ai dhe banorët e Jeruzalemit; prandaj zemërimi i Zotit nuk erdhi mbi ta gjatë jetës së Ezekias.
27. Ezekia pati pasuri shumë të mëdha dhe nder. Ai bëri depozita për argjendin, arin, gurët e çmuar, aromat, mburojat, dhe për çdo lloj objektesh të çmuara,
28. magazina për drithërat, verën e vajin, stalla për çdo lloj gjedhi dhe vathë për delet.
29. Veç këtyre ndërtoi qytete dhe pati një numër të madh kopesh dhe bagëtish të trasha, sepse Perëndia i kishte dhënë pasuri shumë të mëdha.
30. Ishte Ezekia vetë që mbylli burimin e sipërm të ujërave të Gihonit dhe i kanalizoi poshtë në anën perëndimore të qytetit të Davidit. Ezekia ia doli mbanë në të gjitha veprat e tij.
31. Por kur krerët e Babilonisë i dërguan lajmëtarë për t'u informuar për mrekullinë që kishte ndodhur në vend, Perëndia e braktisi për ta vënë në provë e për të njohur gjithçka që ishte në zemrën e tij.
32. Pjesa tjetër e bëmave të Ezekias dhe veprat e tij të mira janë shkruar në vegimin e profetit Isaia, bir i Amotsit, dhe në librin e mbretërve të Judës e të Izraelit.
33. Pastaj Ezekia pushoi bashkë me etërit e tij dhe u varros në shpatin e varreve të bijve të Davidit; në vdekjen e tij gjithë Juda dhe banorët e Jeruzalemit i bënë nderime. Në vend të tij mbretëroi biri i tij Manasi.