12. Na finagalo le Atua ‘ia o‘o atu ‘iā te ia lenei tofotofoga ‘ina ‘ia tu‘uina i ē amulī le fa‘aa‘oa‘o o lona ‘onosa‘i, e pei o Iopu le tagata pa‘ia.
13. Auā na mata‘u pea lava o ia i le Atua e āfua i lona tamaitiiti ma tausi i ana poloa‘iga, o lea ‘ua lē tigā lona loto i le Atua ‘ona ‘ua o‘o ‘iā te ia le ma‘i o le tauaso.
14. A ‘ua mautū i le mata‘u i le Atua ma le lē fa‘agae‘etia, o fa‘afetai atu i le Atua i aso uma o lona ola.
15. Auā e pei ‘ona tauemu o tupu i le tagata pa‘ia o Iopu, sa fa‘apea fo‘i ‘ona tauemu i lona olaga o ona ‘āiga ma ē sa latou masani, o fa‘apea mai:
16. O ifea ‘ea lou fa‘amoemoe sa e faia ai o mea alofa ma e tanu ai o tagata oti?
17. A o Topita sa a‘oa‘i ‘iā te i latou o fa‘apea atu: ‘Aua le fa‘apenā a ‘outou ‘upu;
18. auā o le fānau i tatou a le ‘au pa‘ia, i le ‘ua tatou fa‘atalitali i le ola lenā o le a foa‘iina e le Atua ‘iā te i latou ‘ua lē aumavae lava lo latou fa‘alagolago ‘iā te ia.
19. A o Ana lana avā, sa alu i aso uma i le galuega o le lalaga ma ‘ua ‘aumai o mea e ‘ai sa mafai ‘ona ia maua i le galuega a ona lima.
20. O le mea lea na ala ai ‘ona talia e ia le tama‘i ‘oti ma ‘ua ta‘ita‘i mai i lo latou ‘āiga.
21. Na fa‘alogo lana tane i le leo o le tama‘i ‘oti o lo‘o tagi, ‘ona fa‘apea atu lea: ‘Inā va‘ava‘ai ia ‘oulua, po o se mea na gaoia ‘ea lenā; ‘ia toe momoli atua i ē pule i ai, auā e lē taga ‘iā i tatou i le ‘ai po o le tāofi se mea na gaoia.
22. ‘Ona tali mai lea i ai o lona to‘alua ma le ita: ‘Ua mautinoa nei ‘ua fai fua lou fa‘amoemoe, ‘ua aliali mai nei lava o fua o au mea alofa!
23. Ma ‘ua fa‘amasiasi ‘iā te ia i ‘upu lava ia ma ni isi ‘upu fa‘apenā.