Le mataupu

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14

Feagaiga Tuai

Feagaiga Fou

Topita 10 O LE TUSI PA'IA - Ekalesia Katoliko Roma (RSCB)

‘Ua Popole Topita ma Ana

1. A ‘ua tuai mai o Tovia ‘ona o le tausama‘aga, ‘ona popole ai lea o lona tamā o Topita, ‘ua fa‘apea atu ‘iā Ana: “O le a sou manatu i le mea e tuai mai ai lo‘u atali‘i? po o le a fo‘i le mea e tāofia ai o ia i o?

2. Po ‘ua oti ‘ea o Kapaelu ma ‘ua leai se tasi na te fa‘aolaina mai le tupe ‘iā te ia?”

3. ‘Ua amata lava ‘ona matuā fa‘anoanoa o ia ma lana avā o Ana ma ‘ua amata ‘ona fētāgisi fa‘atasi i lā‘ua, auā ‘ua lē toe fo‘i mai lava le la tama ‘iā te i lā‘ua i le aso na tu‘upoina ai.

4. O lenei, ‘ua tagi lava le tinā ma loimata, ‘ua lē mafai se fa‘amafanafanaga ma ‘ua fai ane: Auē, ‘oi auē, si a‘u tama e! pe se a le mea ‘ua mā ‘auina atu ai oe e faimalaga, o oe le malamalama o mā‘ua mata, o le to‘oto‘o i aso a matutua ai i mā‘ua, o le fa‘amafanafanaga o lo ma olaga, o le fa‘amoemoega o lo ma gafa?

5. Sa lē tatau ‘ona mā fa‘ate‘a‘esea oe, auā o a ma mea uma, o oe to‘atasi lava lea.

6. A ‘ua fai atu ‘iā te ia e Topita: Filemū ia, ‘aua fo‘i ‘e te atuatuvale; o lo‘o saogalemū la tā tama; e fa‘amaoni lava le tagata na tā ‘auina ma ia le tama.

7. A o Ana ‘ua lē mafai lava ‘ona fa‘amafanafanaina o ia; ‘ae sa ulufafo lava o ia i aso uma ma saga matamata solo, ma fealua‘i i ala uma sa fa‘amoemoe o le a mafai ‘ona fo‘i mai ai o ia, ‘ina ‘ia iloa mamao atu o lo‘o sau, pe a mafai lea.

8. A ‘ua fai atu o Rakuelu i le tane a lona afafine: ‘Ia e nofo ‘i‘inei, a ‘ou te ‘auina atu le sāvali e ta‘u atu i lou tamā o Topita o lo‘o e mālōlōina.

9. A ‘ua fai mai o Tovia ‘iā te ia: ‘Ua ‘ou iloa o lo‘o faitau po o la‘u malaga e lo‘u tamā ma lo‘u tinā ma ‘ua puapuagātia o la agaga i totonu ‘iā te i lā‘ua.

10. A ‘ua ‘ai‘oi atu o Rakuelu ‘iā Tovia i ni ‘upu e tele, a ‘ua lē mafai lava ‘iā Tovia ‘ona ‘ana‘ana ‘iā te ia, ‘ona tu‘u atu lea ‘iā te ia o Sara ma le vaeluagalemū o ana mea uma, o ‘au‘auna tane, o ‘au‘auna teine, o mamoe ma kamela ma povi fafine ‘atoa ma le tupe e tele; ma ‘ua tu‘uina atu e alu o ia o fiafia ma mālōlōina;

11. o fai atu: ‘Ia i ai le agelu pa‘ia a le Atua i la ‘oulua malaga, na te ta‘ita‘iina ‘oulua ma le saogalemū ma ‘ia ‘oulua maua atu o ‘oulua mātua, o sololeleia mea uma ‘iā te i lā‘ua ma ‘ia iloa e o‘u mata la ‘oulua fānau manū ‘ou te le‘i oti.

12. ‘Ua fetāgofi i lo la tama teine e ona mātua ma ‘ua la feasogi ma ia ma ‘ua tu‘u atu o ia e alu,

13. o lapata‘i ‘iā te ia ‘ina ‘ia āva i mātua o lana tane, alofa i lana tane, tausi lelei lo la ‘āiga, ‘ia pule lelei i le ‘au ‘āiga ma ‘ia lē mata‘uleagaina o lana aga.