7. ‘Āfai ‘ua maua se tagata ‘ua gaoi i se tasi o ona uso o le fānauga a Isaraelu, ma fai o ia ma pologa, pe fa‘atauina atu o ia; ‘ia oti lea tagata gaoi; ‘ona e tu‘u‘eseina ai lea o le leaga ‘iā te oe.
8. ‘Ia oe i le ma‘i lepela, ‘ia e matuā ‘ana‘ana, ma e faia mea uma lava e pei ‘ona a‘oa‘oina ai ‘outou e le ‘au ositaulaga, o sa Levī; e fa‘apei ‘ona ‘ou fai atu ai ‘iā te i latou, ‘ia ‘outou ‘ana‘ana i ai ia faia.
9. ‘Ia e manatua le mea na faia e le ALI‘I lou Atua ‘iā Miriama i le ala, ‘ina ‘ua ‘outou ō mai ai nai Aikupito.
10. ‘Āfai e avatu e oe se mea, ‘ua ‘aitalafu mai e lē lua te tuā‘oi, ‘aua ne‘i e alu i lona fale e ‘aumai ai lana mea ‘ua tu‘u fa‘afa‘atau,
11. a ‘ia e tu i fafo, ‘ona ‘aumai ai lea i fafo ‘iā te oe o le mea ‘ua tu‘u fa‘afa‘atau e le tagata na avatu i ai mea ‘ua ‘aitalafu mai.
12. ‘Āfai fo‘i o le tagata mativa o ia, ‘aua ‘e te moegaiina lana mea ‘ua tu‘u fa‘afa‘atau;
13. a ‘ia e toe avatua lava ‘iā te ia le mea ‘ua tu‘u fa‘afa‘atau a o le‘i goto le la, ‘ina ‘ia moe o ia i lona lava ‘ofu, ma fa‘amanū ‘iā te oe; e ‘avea fo‘i lea ma amiotonu ‘iā te oe i luma o le ALI‘I lou Atua.
14. ‘Aua ‘e te fa‘asauā i se ‘au‘auna tauia ‘ua puapuagātia ma le mativa, o sou uso, po o se āumau ‘iā te oe i lou nu‘u i au ‘a‘ai;
15. ‘ia e avatu ‘iā te ia lona totogi i lona lava aso, a‘o le‘i goto le la; auā ‘ua mativa o ia, ‘ua naunau fo‘i i ai lona loto; ne‘i vala‘au o ia i le ALI‘I ‘ona o oe, ‘ona fai lea ma agasala ‘iā te oe.
16. ‘Aua ne‘i fasiotia le tamā e sui a‘i le atali‘i, ‘aua fo‘i ne‘i fasiotia le atali‘i, e sui a‘i le tamā; a ‘ia ta‘itasi le tagata ma fasiotia o ia i lana lava agasala.
17. ‘Aua ne‘i e fa‘api‘opi‘oina le fa‘amasinoga i le tagata ‘ese, po o lē ‘ua aumatuā; ‘aua fo‘i ne‘i e fai fa‘afa‘atau le ‘ofu o le fafine ‘ua oti lana tane;
18. a ‘ia e manatua na fai oe ma ‘au‘auna i Aikupito, a ‘ua lavea‘iina oe e le ALI‘I lou Atua a‘i lea mea; o le mea lea ‘ou te fai atu ai ‘iā te oe e faia lenei mea.
19. A ē selesele i lau saito i lou fanua, a ‘ua galo ‘iā te oe se tasi fusi saito i le fanua, ‘aua ne‘i e fo‘i atu e ‘aumai ai; a ‘ia tu‘u ai mo le tagata ‘ese, ma lē ‘ua aumatuā; ma le fafine ‘ua oti lana tane; ‘ina ‘ia fa‘amanuia oe e le ALI‘I lou Atua i mea uma lava e faia e ou lima.
20. A ē tautā i lau olive, ‘aua ‘e te toe su‘esu‘e ‘ona la; a ‘ia tu‘u ai mo le tagata ‘ese, ma lē ‘ua aumatuā, ma le fafine ‘ua oti lana tane.