1. A fa‘aumatia e le ALI‘I lou Atua o nu‘u ‘ua foa‘iina mai o lo latou lau‘ele‘ele e le ALI‘I lou Atua, pe a e fai ai mou, ma e nofo i o latou ‘a‘ai ma o latou fale;
2. ‘ona o vavae‘eseina lea o ‘a‘ai e tolu mo oe, i lou lau‘ele‘ele ‘ua foa‘iina mai o le ALI‘I lou Atua ‘iā te oe e fai mou.
3. ‘Ia e teuteu se ala mo oe, ma ‘ia e vaetoluina itū o lou lau‘ele‘ele, e foa‘iina mou tofi e le ALI‘I lou Atua, ‘ina ‘ia sōsōla i ai o i latou uma o ē fasioti tagata.
4. O le ‘upu fo‘i lenei i le fasioti tagata, e sola i ai, e ola ai o ia; o lē na te fasioti i lē la te tuā‘oi ma le lē iloa, e le‘i mua‘i ita fo‘i ‘iā te ia;
5. a ‘ua la ō ma lē la te tuā‘oi i le vao e ta la‘au, ‘ua ta ifo le tai lona lima e ta ai le la‘au i le matau, ‘ona mole atu ai lea o le u‘amea a‘i le ‘au, ‘ua lavea ai lē la te tuā‘oi, ‘ua oti ai o ia; o ia lava na te sola i se tasi o ia ‘a‘ai, e ola ai.
6. ‘Ina ne‘i tuliloaina le fasioti tagata e lē na te taui ma sui le toto, a o tigā lona loto, ma maua atu ‘iā te ia, auā ‘ua mamao le ala, ‘ona fasioti ai lea ‘iā te ia; ‘ae lē tatau ‘iā te ia le oti, auā e le‘i mua‘i ita o ia ‘iā te ia.
7. O le mea lea ‘ou te fai atu ai ‘iā te oe, e fa‘apea atu: ‘Ia e vavae‘eseina mo oe o ‘a‘ai e tolu.